भोसरीत एसटी बसची इनोव्हाला धडक; दोन वाहनांचे नुकसान

भोसरी | १० ऑक्टोबर २०२६ : भोसरीतील सद्गुरुनगर परिसरात एसटी बसने पाठीमागून धडक दिल्याने एकामागून एक दोन मोटारींचे नुकसान झाल्याची घटना घडली आहे. या अपघातात कारचे दरवाजे, स्टेपनी आणि डिक्कीच्या भागाचे नुकसान झाले. या प्रकरणी भोसरी पोलीस ठाण्यात एसटी बसचालकाविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, संजय निवृत्ती जाधव (वय ५१, रा. गायत्री हॉस्पिटलसमोर, मेहकर रोड, सिंदखेडराजा, जि. बुलढाणा) यांनी फिर्याद दिली आहे.

ही घटना शुक्रवारी (९ ऑक्टोबर २०२६) सकाळी १०.१५ वाजण्याच्या सुमारास भोसरीतील सद्गुरुनगर परिसरात सार्वजनिक रस्त्यावर घडली.

फिर्यादीनुसार, संजय जाधव हे त्यांच्या टोयोटा इनोव्हा क्रिस्टा (MH-27-BH-3333) या कारमधून प्रवास करत होते. त्यावेळी पाठीमागून आलेल्या एसटी महामंडळाच्या बस क्रमांक MH-14-BT-4856 चालकाने वाहतुकीच्या नियमांकडे दुर्लक्ष करून निष्काळजीपणे बस चालवली.

बसने इनोव्हा कारला पाठीमागून जोरदार धडक दिली. या धडकेमुळे इनोव्हा पुढे उभ्या असलेल्या महिंद्रा एक्सयूव्ही ३०० (MH-14-MH-1074) या कारवर आदळली. त्यामुळे इनोव्हाच्या मागील दरवाजाची काच फुटली, मागील दरवाजा चेपला आणि स्टेपनीचे नुकसान झाले. तसेच पुढील महिंद्रा कारच्या डिक्कीच्या उजव्या बाजूलाही नुकसान झाल्याचे फिर्यादीत नमूद करण्यात आले आहे.

या प्रकरणी अविनाश नामदेव राठोड (वय ३०, सध्या रा. सांगली; मूळ रा. अंजनडोह, ता. किल्ले धारूर, जि. बीड) याच्याविरोधात गुन्हा दाखल करण्यात आला आहे.

भोसरी पोलीस ठाण्यात गुन्हा क्रमांक ७४१/२०२६ नोंदविण्यात आला असून, भारतीय न्याय संहितेच्या कलम २८१, ३२४(३) आणि मोटार वाहन कायद्याच्या कलम १८४, ११९/१७७ अंतर्गत गुन्हा दाखल करण्यात आला आहे. पुढील तपास भोसरी पोलीस करत आहेत.