Sep 07 2026
काळेवाडी | 7 सप्टेंबर 2026 : सार्वजनिक रस्त्यावर कार उभी करण्यासाठी दरमहा हप्ता द्यावा लागेल, असे सांगत चौघांनी तरुणाकडे पैशांची मागणी केली. तरुणाने पैसे देण्यास नकार दिल्यानंतर आरोपींनी लोखंडी कोयत्याचा धाक दाखवून त्याच्या खिशातील 1,500 रुपये जबरदस्तीने काढून घेतले. तसेच कारच्या काचा फोडून परिसरातील इतर वाहनांचेही नुकसान केल्याचा आरोप करण्यात आला आहे.
ही घटना 5 सप्टेंबर 2026 रोजी रात्री 11:30 वाजण्याच्या सुमारास काळेवाडीतील अंजिक्य कॉलनी, नढेनगर परिसरात घडली. पवन अशोक जैतमल (वय 29, व्यवसाय—नोकरी, रा. काळेवाडी) यांनी याबाबत काळेवाडी पोलीस ठाण्यात फिर्याद दिली आहे.
फिर्यादीच्या तक्रारीवरून अमन मनीर शेख (वय 21, रा. तापकीर मळा, काळेवाडी), आर्यन कोरे, सौरभ पाटोळे आणि हर्षल वाघमारे यांच्याविरोधात गुन्हा दाखल करण्यात आला आहे. यातील अमन शेख याला पोलिसांनी अटक केल्याची माहिती आहे.
पोलिसांनी दिलेल्या माहितीनुसार, फिर्यादीच्या दाजीने त्यांची स्विफ्ट डिझायर कार घरासमोरील सार्वजनिक रस्त्यावर लॉक करून उभी केली होती. रात्री जेवण झाल्यानंतर फिर्यादी कॉलनीतील रस्त्यावर फेरफटका मारण्यासाठी बाहेर पडले. त्यावेळी आरोपी आणि त्याचे तीन साथीदार तेथे आले.
रस्त्यावर कार लावायची असेल तर दरमहा हप्ता द्यावा लागेल, असे सांगून आरोपींनी फिर्यादीकडे 2 हजार रुपयांची मागणी केल्याचा आरोप आहे. फिर्यादीने पैसे देण्यास नकार दिल्यानंतर आरोपीने हातातील लोखंडी कोयता उगारून त्यांना धमकावले. त्यानंतर कोयत्याने स्विफ्ट डिझायर कारच्या पुढील आणि मागील काचा फोडून नुकसान करण्यात आले.
आरोपींनी कोयत्याचा धाक दाखवत फिर्यादीला पकडले आणि त्यांच्या पँटच्या खिशात ठेवलेली 1,500 रुपयांची रोकड जबरदस्तीने काढून घेतल्याचे तक्रारीत म्हटले आहे. फिर्यादीने आरडाओरडा केल्यानंतर कॉलनीतील नागरिक घटनास्थळी जमा झाले.
नागरिक जमा झाल्यानंतरही आरोपीने कोयता हवेत फिरवत परिसरात दहशत निर्माण केली. रस्त्यावर वाहने उभी करायची असतील तर आम्हाला हप्ता द्यावा लागेल, अशी धमकी देत परिसरातील आणखी काही वाहनांची तोडफोड केल्याचा आरोप आहे.
याप्रकरणी काळेवाडी पोलीस ठाण्यात गुन्हा क्रमांक 429/2026 नोंदवण्यात आला आहे. भारतीय न्याय संहिता, भारतीय हत्यार कायदा आणि महाराष्ट्र पोलीस कायद्यातील संबंधित कलमानुसार पुढील तपास सुरू आहे.
May 12 2026
