अपघातात महिलेचा मृत्यू; दुचाकी घसरल्यानंतर कारची धडक

हिंजवडी | १० ऑक्टोबर २०२६ : मुळशी तालुक्यातील मारुंजी परिसरात दुचाकीवरून प्रवास करणारे कुटुंब रस्त्यावर घसरून पडल्यानंतर भरधाव कारने दिलेल्या धडकेत एका महिलेचा मृत्यू झाला, तर तिचा लहान मुलगा गंभीर जखमी झाला. या प्रकरणी हिंजवडी पोलीस ठाण्यात कारचालकाविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, रविंद्र भानुदास सुशिर (वय ४१, रा. साईनगर, कासारसाई, ता. मुळशी, जि. पुणे) यांनी फिर्याद दिली आहे. अपघातात त्यांच्या पत्नी वर्षा रविंद्र सुशिर यांचा मृत्यू झाला असून, मुलगा आयुष याच्या किरकोळ दुखापतीस कारणीभूत झाल्याचा आरोप आहे.

ही घटना गुरुवारी (८ ऑक्टोबर २०२६) सायंकाळी ६.१५ वाजण्याच्या सुमारास मारुंजी येथील पवना बँकेसमोर सार्वजनिक रस्त्यावर घडली.

फिर्यादीनुसार, रविंद्र सुशिर हे पत्नी वर्षा आणि मुलगा आयुष यांच्यासह होंडा शाईन दुचाकी (MH14 FK1511) वरून कासारसाईकडे जात होते. हिंजवडीच्या दिशेने प्रवास करत असताना त्यांची दुचाकी घसरली आणि ते रस्त्यावर पडले.

त्याचवेळी विरुद्ध दिशेने येणाऱ्या ह्युंदाई कंपनीच्या इलेन्ट्रा कार (MH14 JM0732) चालकाने भरधाव वेगात आणि रस्त्याच्या परिस्थितीकडे दुर्लक्ष करून वाहन चालवत अपघात केल्याचे फिर्यादीत नमूद करण्यात आले आहे.

या अपघातात वर्षा सुशिर यांच्या डोक्यावरून कार गेल्याने त्यांचा मृत्यू झाला. तसेच त्यांचा मुलगा आयुष याला किरकोळ दुखापत झाली.

या प्रकरणी श्रीहरी मोरहरी वाघमारे (वय ३७, रा. चांदखेड, पुणे) याच्याविरोधात गुन्हा दाखल करण्यात आला आहे.

हिंजवडी पोलीस ठाण्यात गुन्हा क्रमांक ८६३/२०२६ नोंदविण्यात आला असून, भारतीय न्याय संहितेच्या कलम १०६(१), २८१, १२५(अ) आणि मोटार वाहन कायद्याच्या कलम १८४, ११२/१७७ अंतर्गत गुन्हा दाखल करण्यात आला आहे. पुढील तपास हिंजवडी पोलीस करत आहेत.