Oct 15 2026
खराबवाडी | १४ ऑक्टोबर २०२६ : खराबवाडी येथील कडवस्ती परिसरात हॉटेलच्या अवघ्या ३०० रुपयांच्या बिलावरून झालेल्या वादात एका तरुणावर कटरने हल्ला केल्याची घटना समोर आली आहे. आरोपीने मित्राला शिवीगाळ आणि दमदाटी करून त्याच्या डाव्या गालावर कटरने वार केल्याचा आरोप आहे. या प्रकरणी दक्षिण महाळुंगे एमआयडीसी पोलीस ठाण्यात गुन्हा दाखल करण्यात आला असून आरोपीला अटक करण्यात आली आहे.
पोलिसांनी दिलेल्या माहितीनुसार, ही घटना १३ ऑक्टोबर २०२६ रोजी रात्री ९ वाजण्याच्या सुमारास मौजे खराबवाडी गावाच्या हद्दीत, कडवस्ती येथील आशिष श्रीराम यांच्या किराणा दुकानासमोर घडली.
या प्रकरणी प्राशू अच्छेलाल रावत (रा. खराबवाडी, ता. खेड, जि. पुणे; मूळ मध्य प्रदेश) यांनी फिर्याद दिली आहे.
फिर्यादीच्या तक्रारीनुसार, त्यांचा मित्र अमर संतोष नायक (वय २१ वर्षे, रा.खराबवाडी, ता. खेड, जि. पुणे; मूळ जि. हिंगोली) याच्यासोबत हॉटेलच्या बिलावरून वाद झाला.
आरोपीने शिवशाही हॉटेलचे ३०० रुपयांचे बिल देण्याच्या कारणावरून फिर्यादीशी वाद घातला. त्यानंतर त्याने शिवीगाळ आणि दमदाटी केल्याचे फिर्यादीत नमूद करण्यात आले आहे.
वाद वाढल्यानंतर आरोपीने कटरने फिर्यादीच्या डाव्या गालावर वार केला. या हल्ल्यात फिर्यादीला गंभीर दुखापत झाल्याचे पोलिसांकडे दाखल तक्रारीत म्हटले आहे.
या प्रकरणी दक्षिण महाळुंगे एमआयडीसी पोलीस ठाण्यात गुन्हा क्रमांक ८४६/२०२६ दाखल करण्यात आला आहे. भारतीय न्याय संहिता २०२३ मधील कलम ११८(२), ३५१(२) आणि ३५२ अंतर्गत गुन्हा नोंदवण्यात आला आहे.
अमर संतोष नायक याला १४ ऑक्टोबर रोजी सायंकाळी ५.३० वाजता अटक करण्यात आल्याची माहिती पोलिसांनी दिली आहे. या घटनेचा पुढील तपास पोलीस करीत आहेत.
May 12 2026
