राष्ट्रीय बीच टेनिस अजिंक्यपद स्पर्धेत पिंपरी-चिंचवडमधील सार्थक आंभोरे आणि शनायु पाटील यांची उत्कृष्ट कामगिरी

राष्ट्रीय बीच टेनिस अजिंक्यपद स्पर्धेत  पिंपरी-चिंचवडमधील सार्थक आंभोरे आणि शनायु पाटील यांची उत्कृष्ट कामगिरी 

पिंपरी, ता. ५ - गोव्यातील मोर्जीम येथे २९ आणि ३० जुलै दरम्यान आयोजित करण्यात आलेल्या ‘भारतीय बीच टेनिस महासंघाच्या’ राष्ट्रीय बीच टेनिस अजिंक्यपद स्पर्धेत महाराष्ट्राचे प्रतिनिधित्व करणाऱ्या पिंपरी-चिंचवडमधील खेळाडूंनी भरीव कामगिरी केली आहे. आकुर्डी येथील डी. वाय. पाटील कॉलेज ऑफ इंजीनियरिंगचे (DYPCOE) विद्यार्थी सार्थक आंभोरे आणि शनायु पाटील यांनी वरिष्ठ दुहेरी गटात उत्कृष्ट कामगिरी करत देशात अव्वल स्थान पटकावले आहे. 

या राष्ट्रीय स्पर्धेत देशभरातील विविध राज्यांच्या नामांकित संघांनी सहभाग घेतला होता. प्रत्येक सामन्यात सार्थक आणि शनायु या जोडीने उत्कृष्ट तांत्रिक कौशल्य, कमालीची जिद्द आणि अप्रतिम संघभावनेचे प्रदर्शन घडवले. राष्ट्रीय स्तरावरील तगड्या आव्हानांना धैर्याने तोंड देत त्यांनी अंतिम सामन्यात विजय मिळवला.  

या उल्लेखनीय आणि दैदिप्यमान यशाबद्दल दोन्ही खेळाडूंचा विशेष सत्कार करण्यात आला. यावेळी क्रीडा क्षेत्रातील खालील प्रमुख मान्यवर उपस्थित होते: ​श्री. प्रभज्योत गिल (अध्यक्ष, भारतीय बीच टेनिस महासंघ) ​मुशाहिद खान (तांत्रिक सचिव, भारतीय बीच टेनिस महासंघ) ​ माधव चितळे (अध्यक्ष, महाराष्ट्र बीच टेनिस असोसिएशन)  सुभाष उरकुडे (सरचिटणीस, महाराष्ट्र बीच टेनिस असोसिएशन)

मार्गदर्शकांचा मोलाचा वाटा

सार्थक आणि शनायु यांच्या या यशामागे त्यांचे प्रशिक्षक डॉ. आबाजी सुबराव माने यांचे बहुमोल मार्गदर्शन लाभले. डॉ. माने यांनी घेतलेले कडक परिश्रम, योग्य रणनीती आणि दिलेल्या प्रेरणेमुळेच खेळाडूंना हे यश संपादन करता आले, अशा भावना यावेळी व्यक्त करण्यात आल्या. ​राष्ट्रीय स्तरावर महाराष्ट्राची आणि डी. वाय. पाटील कॉलेज ऑफ इंजीनियरिंगची (DYPCOE) मान अभिमानाने उंचवणाऱ्या सार्थक आंभोरे आणि शनायु पाटील या दोन्ही खेळाडूंचे शिक्षण संस्था, क्रीडा क्षेत्र आणि सर्व स्तरातून मनःपूर्वक अभिनंदन होत आहे. त्यांच्या या यशाबद्दल त्यांचे कौतुक करत पुढील वाटचालीस शुभेच्छा दिल्या जात आहेत.