क्राइम रिपोर्ट - शहरातील गुन्हेगारीविषयक बातम्या - ता. १६ जुलै २०२६

क्राइम रिपोर्ट -

शहरातील गुन्हेगारीविषयक बातम्या -  ता. १६ जुलै २०२६

------------------------------------------------------------------------------------------------------------------------------------------------------------------------------------------------------------------------------------------------------------------------

➡️ सायबर फसवणूक प्रकरणी देहूरोडमधील आरोपीला अटक 

एका इसमाच्या बॅंक खात्याचा गैरवापर आणि दोन जणांची आर्थिक फसवणूक केल्याप्रकरणी २४ वर्षीय आरोपीला पोलिसांनी अटक केली आहे. दिनांक ४ जानेवारी २०२६ ते दिनांक ८ जुलै २०२६ या कालावधीत ही फसवणूक घडली आहे.

याबाबत, सायबर पोलिस ठाण्याचे हवालदार हेमंत साधू खरात यांनी फिर्याद नोंदवली आहे. अटक आरोपीचे नाव कुणाल हनुमंत सातपुते (वय २४ वर्षे, रा. थॉमस कॉलनी देहुरोड) असे आहे. आरोपीने त्याच्या साथीदारांसोबत संगनमत करून अभिजित विकास चव्हाण (वय २६, रा. थॉमस कॉलनी, देहूरोड) यांच्या नावावरील बँक खात्याचा वापर केला. हे खाते वैयक्तिक कामासाठी घेतल्यानंतर त्यातून ५४ लाख ६२ हजार ५५३ रुपयांचे संशयित आर्थिक व्यवहार करण्यात आले. या व्यवहारांच्या माध्यमातून भारतातील दोन नागरिकांची एकूण १ कोटी ५ लाख ६३ हजार ५०० रुपयांची आर्थिक फसवणूक झाल्याचे तपासात समोर आले आहे.

या प्रकरणी आरोपीविरोधात बुधवारी (ता. १५) सायबर पोलिस ठाण्यात भारतीय न्याय संहीता कलम ११२ (२), ६१(२), ३१८(४), ३(५) अन्वये गुन्हा दाखल करण्यात आला आहे, अशी माहिती पोलिसांनी दिली.  

------------------------------------------------------------------------------------------------------------------------------------------------------------------------------------------------------------------------------------------------------------------------

➡️ शिरगावात २८ लिटर गावठी हातभट्टी दारूसह एकास अटक

शिरगाव पोलिसांनी कारवाई करत २८ लिटर गावठी हातभट्टीची दारू जप्त करून २५ वर्षीय तरुणाला अटक केली. ही कारवाई बुधवारी (ता. १५) शिरगाव परिसरातील गहुंजे-शिरगाव रस्त्यालगत करण्यात आली.

या प्रकरणी शहर गुन्हे शाखेच्या दारुबंदी विरोधी पथकातील पोलिस नाईक सचिन वामनराव गोनटे यांनी फिर्याद नोंदवली. पोलिसांनी दिलेल्या माहितीनुसार, आरोपी विनायक ईश्वर राजपूत (वय २५, रा. कंजारभट वस्ती, शिवसाई सोसायटीजवळ, शिरगाव) हा शासनाने प्रतिबंधित केलेली मानवी आरोग्यास अपायकारक हातभट्टीची दारू विक्रीसाठी बाळगताना आढळून आला. त्याच्याकडून २ हजार ८०० रुपये किंमतीची सुमारे २८ लिटर गावठी हातभट्टीची दारू जप्त करण्यात आली.

पोलिसांनी आरोपीला अटक केली आहे. आरोपीविरोधात शिरगाव पोलिस ठाण्यात भारतीय न्याय संहिता कलम १२३ तसेच महाराष्ट्र दारूबंदी अधिनियम कलम ६५ (ई) अन्वये गुन्हा दाखल करण्यात आला आहे.

------------------------------------------------------------------------------------------------------------------------------------------------------------------------------------------------------------------------------------------------------------------------

➡️ सायबर गुन्हेगारी टोळीला बँक खाते वापरण्यास दिल्याप्रकरणी १९ वर्षीय तरुणावर गुन्हा दाखल 

स्वतःचे बँक खाते संघटित सायबर गुन्हेगारी टोळीच्या वतीने वापरण्यासाठी उपलब्ध करून दिल्याप्रकरणी काळेवाडी पोलिसांनी एका १९ वर्षीय तरुणाविरोधात गुन्हा दाखल केला आहे. या खात्यामधून तब्बल २३ लाख २३ हजार ३४१ रुपयांचे आर्थिक व्यवहार झाल्याचे पोलिस तपासात निष्पन्न झाले आहे.

या प्रकरणी काळेवाडी पोलिस ठाण्याचे पोलिस शिपाई भास्कर किसन भारती यांनी फिर्याद दिली आहे. त्यानुसार आरोपी प्रेम नंदू लोखंडे (वय १९, रा. काळेवाडी फाटा, ड्रायव्हर कॉलनी) याच्याविरोधात भारतीय न्याय संहिता कलम ११२(२), ६१(२), ३१८(४), ३(५) तसेच माहिती तंत्रज्ञान कायदा २००० चे कलम ६६ (डी) अंतर्गत गुन्हा दाखल करण्यात आला आहे.

आरोपीने स्वतःच्या नावावर  बँकेत खाते उघडले होते. हे खाते सायबर गुन्हे करणाऱ्या टोळीच्या वापरासाठी उपलब्ध करून दिले आणि या खात्यातून १३ जानेवारी २०२६ ते ३० जून २०२६ या कालावधीत आर्थिक व्यवहार झाले. या व्यवहारांमध्ये भारतातील दोन नागरिकांची एकूण २ लाख ६२ हजार ९४८ रुपयांची आर्थिक फसवणूक झाल्याचे तपासात समोर आले आहे. पोलिस अधिक तपास करत आहेत.

------------------------------------------------------------------------------------------------------------------------------------------------------------------------------------------------------------------------------------------------------------------------

➡️ मेफेड्रोन पावडर विक्रीसाठी बाळगणाऱ्या तरुणाला अटक 

पिंपरी पोलिसांनी काळभोरनगर-चिंचवड येथे कारवाई करत एका ३५ वर्षीय तरुणाकडून १८ हजार २०० रुपये किमतीचे एमडी (मेफेड्रोन) पावडर जप्त केली. या तरुणाला पोलिसांनी अटक केली आहे. 

या  प्रकरणी पिंपरी पोलिस ठाण्याचे हवालदार अशोक लक्ष्मण डगळे यांनी फिर्याद नोंदवली. पोलिसांनी दिलेल्या माहितीनुसार, ही कारवाई बुधवारी (ता. १५) काळभोरनगर-चिंचवड येथील सार्वजनिक रस्त्यावर करण्यात आली. आरोपी शिवा भारत निमजे (वय ३५, रा. तळेगाव दाभाडे) याने बेकायदेशीरपणे एमडी पावडर विक्रीसाठी बाळगली होती. जप्त केलेल्या एमडी पावडरचे निव्वळ वजन ३.६४ ग्रॅम (पॉलीथिनसह वजन ४.४५० ग्रॅम) जप्त करण्यात आले. 

या एमडी पावडरची किंमत १८ हजार २०० रुपये आहे. आरोपीकडे असलेली सुमारे पाच लाख रुपये किमतीची ग्रे रंगाची मारुती वॅगनआर कार देखील पोलिसांनी ताब्यात घेतली आहे. या प्रकरणी आरोपीविरोधात पिंपरी पोलिस ठाण्यात एनडीपीएस कायद्यानुसार कलम ८(क), २१(ब) प्रमाणे गुन्हा दाखल करण्यात आला आहे. 

------------------------------------------------------------------------------------------------------------------------------------------------------------------------------------------------------------------------------------------------------------------------

➡️ अफूच्या सुकवलेल्या बोंडांचा चुरा बाळगणाऱ्या इसमास पुनावळेतून अटक, एनडीपीएस अंतर्गत गुन्हा दाखल

 पुनावळे परिसरात अंमली पदार्थ विरोधी पथकाने कारवाई करत २०० ग्रॅम पॉपी स्ट्रॉ (अफूच्या सुकवलेल्या बोंडांचा चुरा) बाळगणाऱ्या एका आरोपीला अटक केली. ही कारवाई १५ जुलै रोजी दुपारी रावेत पोलिसांच्या हद्दीत करण्यात आली.

या प्रकरणी  पोलिस शिपाई गोविंद देवराव डोके (अंमली पदार्थ विरोधी पथक, गुन्हे शाखा, पिंपरी-चिंचवड) यांनी फिर्याद दिली आहे.

पोलिसांनी दिलेल्या माहितीनुसार, राजाराम जगाराम चौधरी (वय ४२, रा. पुनावळे) याच्याकडे २०० ग्रॅम पॉप्पी स्ट्रॉ, एक मोबाईल फोन आणि दुचाकी असा एकूण ६३ हजार रुपयांचा मुद्देमाल आढळून आला. तो हा अंमली पदार्थ विक्रीसाठी बाळगत असल्याचे तपासात निष्पन्न झाले.

चौधरी याने हा पदार्थ सुमेर बिश्नोई (पूर्ण नाव व पत्ता माहिती नाही) याने आणून दिल्याचे पोलिसांना सांगितले आहे. या प्रकरणात आरोपी राजाराम चौधरी याला अटक करण्यात आली असून, सुमेर बिश्नोई याचा शोध सुरू आहे. आरोपींविरुद्ध रावेत पोलिस ठाण्यात एनडीपीएस कायद्यानुसार कलम ८(क), १५(अ) व २९ अंतर्गत गुन्हा दाखल करण्यात आला आहे.

------------------------------------------------------------------------------------------------------------------------------------------------------------------------------------------------------------------------------------------------------------------------

➡️ थेरगावात सोरट जुगार खेळवणारे दोघे पोलिसांच्या ताब्यात

थेरगाव परिसरात बुधवारी (ता. १५) सोरट जुगार खेळवणाऱ्या दोघांना पोलिसांनी ताब्यात घेतले आहे. ताब्यात घेतलेली युवती २० वर्षांची व युवक २५ वर्षांचा आहे.  डांगे चौकाजवळ ताथवडे बाजूकडून येणाऱ्या रस्त्यालगत हा जुगार अड्डा सुरु होता. 

या प्रकरणी वाकड पोलीस स्टेशनचे विक्रम मनोहर भगत यांनी फिर्याद दिली. पोलिसांनी दिलेल्या माहितीनुसार, आरती विशाल पवार (वय २०, रा. काळेवाडी फाटा, थेरगाव) आणि आकाश शहाजी करंडे (वय २५, रा. काळेवाडी फाटा, थेरगाव) हे स्वतःच्या आर्थिक फायद्यासाठी सोरट जुगार खेळवत असल्याचे आढळून आले.कारवाईदरम्यान पोलिसांनी २४० रुपये किमतीचा जुगाराचे साहित्य व ६५० रुपये रोख रक्कम असा मुद्देमाल जप्त केला. दोन्ही आरोपींना ताब्यात घेण्यात आले आहे.

आरोपींविरोधात वाकड पोलिस ठाण्यात महाराष्ट्र जुगार प्रतिबंधक अधिनियम कलम १२ (अ) अंतर्गत गुन्हा दाखल करण्यात आला आहे.

------------------------------------------------------------------------------------------------------------------------------------------------------------------------------------------------------------------------------------------------------------------------

➡️ निगडीत ३१८ ग्रॅम गांजासह एकाला अटक

शहर गुन्हे शाखेच्या अंमली पदार्थ विरोधी पथकाने बुधवारी (ता. १५) निगडी परिसरातून गांजा बाळगणाऱ्या इसमाला ताब्यात घेतले. त्याच्याकडून ३१८ ग्रॅम वजनाचा गांजा जप्त केला आहे.  

याबाबत, गुन्हे शाखेच्या अंमली पदार्थ विरोधी पथकाचे  पोलिस शिपाई  प्रतिक संभाजी कवडे यांनी फिर्याद दिली.  पोलिसांनी दिलेल्या माहितीनुसार, ही कारवाई १५ जुलैला ओटा स्कीम परिसरात करण्यात आली. आरोपी कलीम कादर शेख (वय ४२, रा. अहिंसक महाबुद्ध विहारासमोर, ओटा स्कीम, निगडी, पुणे) याच्याकडे विक्रीसाठी ठेवलेला ३१८ ग्रॅम वजनाचा गांजा आढळून आला. गांजासह त्याच्याकडून ४०० रुपये रोख रक्कम असा एकूण १६ हजार ३०० रुपयांचा मुद्देमाल जप्त करण्यात आला.

 आरोपीविरुद्ध निगडी पोलिस ठाण्यात एनडीपीएस कायद्यातील कलम ८ (क), २० (ब) (ii) (अ) अंतर्गत गुन्हा दाखल करण्यात आला आहे.

ही कारवाई पोलीस उपनिरीक्षक भिंगारदिवे यांच्या मार्गदर्शनाखाली पोलीस हवालदार रावते यांनी केली.

------------------------------------------------------------------------------------------------------------------------------------------------------------------------------------------------------------------------------------------------------------------------