Oct 10 2026
पिंपरी-चिंचवड | १० ऑक्टोबर २०२६ : रहाटणी परिसरातील एका स्पा सेंटर चालकाकडे ५० हजार रुपयांची खंडणी मागितल्याप्रकरणी साप्ताहिक ‘वंचित सामना’शी संबंधित पत्रकाराला पिंपरी-चिंचवड पोलिसांच्या खंडणीविरोधी पथकाने अटक केली आहे. स्पा सेंटरविरोधात बातम्या प्रसिद्ध करून व्यवसाय बंद पाडण्याची तसेच जीवे मारण्याची धमकी दिल्याचा आरोप आहे. पोलिसांनी सापळा रचून १० हजार रुपये स्वीकारताना आरोपीला पकडले.
पोलिसांनी दिलेल्या माहितीनुसार, अक्षय अरुण वाघमारे (वय ३५) असे अटक करण्यात आलेल्या आरोपीचे नाव आहे. तो साप्ताहिक ‘वंचित सामना’चा पत्रकार असल्याची माहिती देण्यात आली आहे.
रहाटणी येथील एका स्पा सेंटर चालकाला व्यवसाय सुरू ठेवण्यासाठी ५० हजार रुपये देण्याची मागणी करण्यात आल्याची तक्रार पोलिसांकडे प्राप्त झाली होती. पैसे न दिल्यास स्पा सेंटरविरोधात बातम्या छापून व्यवसाय बंद पाडण्याची आणि जीवे मारण्याची धमकी दिल्याचे तक्रारीत नमूद करण्यात आले आहे.
तक्रार मिळाल्यानंतर पिंपरी-चिंचवड पोलिसांच्या खंडणीविरोधी पथकाने माहितीची पडताळणी केली. त्यानंतर जगताप डेअरी चौकातील साई कॉर्नर परिसरात सापळा रचण्यात आला.
यावेळी तक्रारदाराकडून १० हजार रुपये स्वीकारताना अक्षय वाघमारे याला पोलिसांनी ताब्यात घेतले. त्यानंतर त्याला अटक करण्यात आली.
या कारवाईत आरोपीकडून रोख रक्कम, मोबाईल फोन, पत्रकाराचे ओळखपत्र आणि होंडा कार असा एकूण २ लाख ७७ हजार ५०० रुपयांचा मुद्देमाल जप्त करण्यात आला आहे.
या प्रकरणी काळेवाडी पोलीस ठाण्यात भारतीय न्याय संहितेच्या कलम ३०८(२) आणि ३०८(५) अंतर्गत खंडणीचा गुन्हा दाखल करण्यात आला आहे.
ही कारवाई पिंपरी-चिंचवडचे पोलीस आयुक्त विनय कुमार चौबे यांच्या मार्गदर्शनाखाली खंडणीविरोधी पथकाने केली. या प्रकरणाचा पुढील तपास पोलीस करत आहेत.
May 12 2026
