मुलाला दिल्लीत महाविद्यालयीन प्रवेश देण्याच्या बहाण्याने 10 लाखांची फसवणूक; 4 जणांवर गुन्हा
Sep 04 2026
वाकड | 3 सप्टेंबर 2026 : मुलाला दिल्लीतील महाविद्यालयात प्रवेश मिळवून देण्याचे आश्वासन देऊन पालकाकडून ऑनलाइन आणि रोख स्वरूपात एकूण 10 लाख रुपये घेत फसवणूक केल्याचा प्रकार समोर आला आहे. प्रवेश मिळवून न देता स्वीकारलेली रक्कमही परत न केल्याच्या आरोपावरून 4 जणांविरोधात काळेवाडी पोलीस ठाण्यात गुन्हा दाखल करण्यात आला आहे.
याप्रकरणी अमित धरमचंद जैन - वय 45 यांनी फिर्याद दिली आहे. ही घटना 14 जून ते 3 सप्टेंबर 2026 या कालावधीत फिर्यादीच्या निवासस्थानी आणि वाकडमधील भूमकर चौकातील वन व्हिजन मॉलमध्ये असलेल्या एच. एम. रियालिटीच्या कार्यालयात घडली.
पोलिसांनी दिलेल्या माहितीनुसार, एच. एम. रियालिटीच्या कार्यालयाशी संबंधित सिद्धार्थ, विव्हान, वेदिका आणि तन्मय अशी नावे सांगणाऱ्या 4 मोबाइलधारकांनी अमित जैन यांच्याशी संपर्क साधला. जैन यांच्या मुलाला दिल्ली टेक्निकल युनिव्हर्सिटीशी संबंधित महाविद्यालयामध्ये प्रवेश मिळवून देण्याचे आश्वासन त्यांनी दिल्याचा आरोप आहे.
प्रवेश प्रक्रियेच्या नावाखाली आरोपींनी जैन यांच्याकडून प्रथम 3 लाख रुपये ऑनलाइन स्वीकारले. त्यानंतर 7 लाख रुपये रोख स्वरूपात घेण्यात आले. अशा प्रकारे आरोपींनी एकूण 10 लाख रुपये स्वीकारल्याचे फिर्यादीत नमूद करण्यात आले आहे.
रक्कम दिल्यानंतरही जैन यांच्या मुलाला संबंधित महाविद्यालयात प्रवेश मिळाला नाही. त्यांनी आरोपींकडे पैसे परत मागितले; मात्र रक्कमही परत करण्यात आली नाही. प्रवेशाचे आश्वासन देऊन विश्वास संपादन करत पैशांचा अपहार आणि फसवणूक केल्याचा आरोप फिर्यादीने केला आहे.
याप्रकरणी काळेवाडी पोलीस ठाण्यात गुन्हा क्रमांक 412/2026 नोंदवण्यात आला आहे. भारतीय न्याय संहितेच्या कलम 316(2), 318(4) आणि 3(5) अंतर्गत पुढील तपास सुरू आहे.
May 12 2026
