पाण्याच्या टँकरची दुचाकीला धडक; 21 वर्षीय तरुणाचा मृत्यू

पुनावळे | 10 सप्टेंबर 2026 : भरधाव दहा टायरी पाण्याच्या टँकरने समोरून येणाऱ्या दुचाकीला धडक दिल्याने 21 वर्षीय तरुणाचा मृत्यू झाल्याची घटना पुनावळे गावठाण परिसरात घडली. अपघातानंतर टँकर चालकाविरोधात निष्काळजीपणे वाहन चालवून मृत्यूस कारणीभूत ठरल्याचा गुन्हा दाखल करण्यात आला आहे.

अर्पित प्रवीणसिंग येवतीकर (वय 21) असे अपघातात मृत्यू झालेल्या तरुणाचे नाव आहे. निखिलसिंग प्रवीणसिंग सिसोदिया (वय 22, रा. श्रीराम कॉलनी, दत्तनगर, दिघी) यांनी याबाबत फिर्याद दिली आहे.

त्यांच्या फिर्यादीवरून महादेव रमाकांत किडे (वय 35, सध्या रा. बालेवाडी, पुणे; मूळ रा. लातूर) याच्याविरोधात रावेत पोलीस ठाण्यात गुन्हा नोंदवण्यात आला आहे.

पोलिसांनी दिलेल्या माहितीनुसार, 9 सप्टेंबर रोजी पहाटे 2:30 वाजण्याच्या सुमारास पुनावळे गावठाणातील पुणे जिल्हा मध्यवर्ती सहकारी बँकच्या शाखेजवळ अर्पित दुचाकीवरून जात होता. त्याची मोटारसायकल क्रमांक MH 14 NN 9583 होती.

त्यावेळी दर्शले चौकाच्या दिशेने येणारा दहा टायरी पाण्याचा टँकर क्रमांक MH 17 AG 5576 आरोपी चालवत होता. वाहतुकीच्या नियमांकडे दुर्लक्ष करून टँकर निष्काळजीपणे आणि भरधाव चालवत दुचाकीला समोरून उजव्या बाजूने धडक दिल्याचा आरोप तक्रारीत करण्यात आला आहे.

या धडकेत अर्पितच्या डोक्याला गंभीर दुखापत झाली. गंभीर मार लागल्यामुळे त्याचा मृत्यू झाल्याचे पोलिसांच्या नोंदीत नमूद करण्यात आले आहे. अपघातातील वाहनांचे नुकसान आणि घटनास्थळावरील परिस्थितीचा पंचनामा करण्यात आला.

याप्रकरणी 9 सप्टेंबर रोजी दुपारी 4:36 वाजता रावेत पोलीस ठाण्यात गुन्हा क्रमांक 378/2026 दाखल करण्यात आला. भारतीय न्याय संहितेच्या कलम 106(1), 281, 324(4) तसेच मोटार वाहन कायद्याच्या कलम 184 आणि 177/134 अंतर्गत पुढील तपास सुरू आहे.