Aug 29 2026
महाळुंगे | २९ ऑगस्ट २०२६ : पाण्याची टाकी फुटल्याचा जाब विचारण्यासाठी गेलेल्या शेतकऱ्याला शिवीगाळ करून लोखंडी रॉडने बेदम मारहाण करण्यात आली. या हल्ल्यात शेतकऱ्याच्या डोक्याला, पाठीला, हाताला आणि बोटांना गंभीर दुखापत झाली. ही घटना खेड तालुक्यातील पिंपरी खुर्द येथील पाटील वस्तीमध्ये २३ ऑगस्ट रोजी दुपारी तीनच्या सुमारास घडली.
याप्रकरणी रंगनाथ देवराम काळे (वय ४२, रा. पिंपरी खुर्द, ता. खेड) यांनी फिर्याद दिली आहे. त्यांच्या फिर्यादीवरून शुभम कैलास काळे (वय ३०, रा. पिंपरी खुर्द) याच्याविरोधात महाळुंगे एमआयडीसी पोलीस ठाण्यात गुन्हा दाखल करण्यात आला आहे. आरोपी हे फिर्यादीचे चुलत भाऊ आहेत.
पोलिसांनी दिलेल्या माहितीनुसार, फिर्यादी आपल्या पोल्ट्रीसमोरचा रस्ता सपाट करत होते तर आरोपी चुलत भाऊ त्याच्या बंगल्याचा बांध लावत असताना दगड उडून पोल्ट्रीच्या पाण्याच्या टाकीला लागला व टाकी फुटली. या प्रकाराबाबत जाब विचारण्यासाठी फिर्यादी आरोपीकडे गेले. त्यावेळी आरोपीने फिर्यादीची आई आणि पत्नीला शिवीगाळ केली. त्यानंतर हातातील लोखंडी रॉडने फिर्यादीच्या उजव्या हाताची बोटे, पाठ, डोक्याचा मागील भाग आणि डाव्या हाताच्या मनगटावर मारहाण केली. या हल्ल्यात फिर्यादी जखमी झाले.
घटनेनंतर फिर्यादीने पोलिसांकडे तक्रार दिली. त्यानुसार उत्तर महाळुंगे पोलीस ठाण्यात गुन्हा क्रमांक ४७/२०२६ नोंदवण्यात आला असून, भारतीय न्याय संहितेच्या संबंधित कलमांनुसार पुढील तपास सुरू आहे.
May 12 2026
