Oct 09 2026
भोसरी | ९ ऑक्टोबर २०२६ : बनावट कागदपत्रांच्या आधारे महाराष्ट्रातील रहिवासी असल्याचे दाखवून पंतप्रधान आवास योजनेअंतर्गत भोसरीतील पीएमआरडीएचा फ्लॅट स्वतःच्या नावावर करून शासनाची फसवणूक केल्याचा प्रकार समोर आला आहे. या प्रकरणी एका महिलेसह तिघांविरोधात भोसरी एमआयडीसी पोलीस ठाण्यात गुन्हा दाखल करण्यात आला असून एका आरोपीला अटक करण्यात आली आहे.
या प्रकरणी अशोक शिवाजी भोगल (वय ३७, पोलीस बक्कल क्रमांक २८०४, दहशतवाद विरोधी शाखा, पिंपरी-चिंचवड पोलीस आयुक्तालय) यांनी फिर्याद दिली आहे.
पोलिसांनी दिलेल्या माहितीनुसार, मोहम्मद दानिश अब्दुल माजिद शेख (वय ४५, रा. व्याघ्रगड सहकारी गृहनिर्माण संस्था, सेक्टर १२, भोसरी), एक ३९ वर्षीय महिला आणि इरफान शेख (रा. खराळवाडी, पुणे) अशी आरोपींची माहिती आहे. यातील मोहम्मद दानिश शेख याला अटक करण्यात आली आहे.
फिर्यादीनुसार, मोहम्मद दानिश शेख याचा जन्म उत्तर प्रदेशात झाला होता. त्याने खडकी येथील डॉ. झाकीर हुसेन उर्दू ज्युनिअर कॉलेजचा शाळा सोडल्याचा दाखला तसेच त्याचे वडील अब्दुल माजिद फरीद यांच्या नावाचा धाराशिव जिल्ह्यातील नगर परिषद शाळेचा निर्गम उतारा अशी कागदपत्रे एजंट इरफान शेख याच्याकडून बनवून घेतल्याचा आरोप आहे.
या कागदपत्रांच्या आधारे आरोपीने सन २०११ मध्ये हवेली तहसील कार्यालयातून महाराष्ट्रातील रहिवासी दाखला मिळविल्याचे फिर्यादीत नमूद आहे.
त्यानंतर आरोपी आणि त्याची पत्नी यांनी या रहिवासी दाखल्याचा वापर करून पंतप्रधान आवास योजनेअंतर्गत आकुर्डी येथील पीएमआरडीएच्या शासकीय प्रकल्पात अर्ज केला. भोसरीतील व्याघ्रगड सहकारी गृहनिर्माण संस्थेच्या बी-२० इमारतीतील फ्लॅट क्रमांक १०४ स्वतःच्या नावावर करून शासनाची फसवणूक केल्याचा आरोप करण्यात आला आहे.
हा प्रकार २१ मे २०२१ ते १४ सप्टेंबर २०२३ या कालावधीत घडल्याचे नमूद आहे. याप्रकरणी ८ ऑक्टोबर २०२६ रोजी रात्री ८.२६ वाजता भोसरी एमआयडीसी पोलीस ठाण्यात भारतीय न्याय संहितेच्या कलम ४६७, ४६८, ४७१, ४२० आणि ३४ अंतर्गत गुन्हा दाखल करण्यात आला आहे. पुढील तपास पोलीस करत आहेत.
May 12 2026
