Oct 17 2026
चाकण | १७ ऑक्टोबर २०२६ : खेड तालुक्यातील कडाचीवाडी परिसरात देशी बनावटीचे पिस्तूल आणि दोन जिवंत काडतुसे बाळगल्याचा प्रकार समोर आला आहे. पिस्तूल बाळगण्याचा कोणताही परवाना नसताना शस्त्र बाळगल्याप्रकरणी एका विधिसंघर्षित बालकाविरुद्ध चाकण दक्षिण पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना १६ ऑक्टोबर २०२६ रोजी रात्री ११.५५ वाजण्याच्या सुमारास मौजे कडाचीवाडी, ता. खेड, जि. पुणे येथील ठाकर वस्तीजवळील पाण्याच्या टाकीजवळ घडली.
या प्रकरणी पोलीस अंमलदार सुनील गोविंद भागवत (वय ३८) यांनी फिर्याद दिली आहे. ते चाकण दक्षिण पोलीस ठाण्यात नेमणुकीस आहेत.
फिर्यादीत नमूद केल्यानुसार, संबंधित विधिसंघर्षित बालकाकडे ५० हजार रुपये किमतीचे देशी बनावटीचे सिल्व्हर रंगाचे पिस्तूल आढळले. पिस्तुलाच्या ग्रिपवर काळ्या रंगाची पट्टी होती. तसेच त्याच्याकडे दोन जिवंत काडतुसे होती.
पिस्तुलावर ७.६५ केएफ असे लिहिलेले असल्याचे तक्रारीत नमूद करण्यात आले आहे.
संबंधित बालकाकडे पिस्तूल बाळगण्याचा कोणत्याही प्रकारचा परवाना नसताना त्याने कंबरेला बेकायदेशीररीत्या पिस्तूल आणि दोन जिवंत काडतुसे बाळगली, असा आरोप आहे.
तसेच या प्रकारातून पिंपरी-चिंचवड पोलीस आयुक्तांनी लागू केलेल्या हत्यारबंदी आदेशाचे उल्लंघन झाल्याचे फिर्यादीत नमूद करण्यात आले आहे.
या प्रकरणी चाकण दक्षिण पोलीस ठाण्यात गुन्हा क्रमांक २७४/२०२६ दाखल करण्यात आला आहे. भारतीय शस्त्र अधिनियमातील कलम ३(२५) आणि महाराष्ट्र पोलीस कायद्यातील कलम ३७(१)(३) व १३५ नुसार गुन्ह्याची नोंद करण्यात आली असून, पुढील तपास पोलीस उपनिरीक्षक सांगिडवार करत आहेत.
May 12 2026
