बकरी ईदनिमित्त काँग्रेसकडून मुस्लीम बांधवांना गुलाबपुष्प भेट देऊन शुभेच्छा

पिंपरी ता. 28 - बकरी ईदनिमित्त काँग्रेसकडून चिंचवडगाव येथील ईदगाह जवळ मुस्लिम बांधवांना गुलाबपुष्प देऊन बंधुता, प्रेमाचा संदेश देत बकरी ईदच्या शुभेच्छा देण्यात आल्या. या शुभेच्छांना 'मोहब्बत का गुलाब' असे सुंदर नाव देण्यात आले होते आणि ही सुंदर भेट मिळाल्याने मुस्लिम बांधवांनी आनंद व्यक्त केला. याप्रसंगी मुस्लिम बांधवांनी आभार व्यक्त करत ईदगाह समितीच्या वतीने काँग्रेसचे शहराध्यक्ष नरेंद्र बनसोडे यांचा शाल देऊन सन्मान केला.

याबद्दल माहिती देताना काँग्रेस शहराध्यक्ष नरेंद्र बनसोडे यांनी सांगितले, "प्रेम, त्याग, बलिदान, शांती, सद्भाव यांचा संदेश देणारा इस्लाम धर्म आणि त्या अंतर्गत येणाऱ्या बकरी ईद या उत्सवानिमित्त मोहब्बत का गुलाब देत मुस्लिम बांधवांना आपुलकी, प्रेम, एकोपा आणि बंधू भावाचा संदेश देत ईदच्या शुभेच्छा देत आहोत, आज देशामध्ये वाढत असलेली सामाजिक अराजकता पाहिली तर सत्ताधारी हे हिंदू मुस्लिम द्वेष निर्माण करून स्वतःच्या राजकीय पोळ्या भाजताना दिसतात पण कोणत्याही सत्तेपेक्षा सत्य हे मोठे असते आणि ते सत्य हे समतेचे आहे, प्रेमाचे आहे, बंधू भावाचे आहे हे या भारत भूमीने आपणाला अनेक वेळा दर्शविले आहे, देशाचे नेते राहुलजी गांधी यांनी दिलेल्या नफरत की बाजार में मोहब्बत की दुकान खोल रहा हू या ब्रीदवाक्य प्रमाणे आज सर्व मुस्लिम बांधवांना शुभेच्छा देत आनंद साजरा करत आहोत".

'मोहब्बत का गुलाब' या सेवा उपक्रमात काँग्रेसचे शहराध्यक्ष नरेंद्र बनसोडे, काँग्रेसचे माजी सरचिटणीस जितेंद्र छाबडा, हरिष डोळस, सेवा दलाचे ज्येष्ठ पदाधिकारी उमेश बनसोडे, अनुसूचित जाती विभागाचे माजी अध्यक्ष विजय ओव्हाळ, युनूस बागवान, कुणाल भोसले आदी पदाधिकारी उपस्थित होते.