शहरातील क्रिडा प्रकल्पांची प्रलंबित कामे तातडीने पूर्ण करावी, क्रिडा समिती सभापती कैलास कुटे यांचे प्रशासनाला निर्देश

पिंपरी, ता. ६ - पिंपरी-चिंचवड महापालिकेच्या विविध क्रिडा प्रकल्पांचा दर्जा सुधारण्यासाठी आणि नागरिकांना अद्ययावत सोयीसुविधा उपलब्ध करुन देण्यासाठी प्रलंबित कामे तातडीने पूर्ण करण्याचे आणि सुरक्षेच्या दृष्टीने आवश्यक उपाययोजना करण्याचे निर्देश क्रिडा समिती सभापती कैलास कुटे यांनी गुरुवारी (ता. ५) प्रशासनाला दिले.

गुरुवारी सकाळी १० वाजता मोहननगर येथील जलतरण तलावापासून कुटे यांच्या पाहणी दौऱ्याची सुरुवात झाली. यावेळी त्यांच्यासोबत क्रीडा उपायुक्त पंकज पाटील, माजी नगरसेविका मीनल यादव, कार्यकारी अभियंता (क्रीडा स्थापत्य) विजय जाधव, कनिष्ठ अभियंता संदीप ठोकळे आणि प्र. क्रीडा अधिकारी रंगराव कारंडे उपस्थित होते.

पाहणी दरम्यान सभापतींनी जलतरण तलावाच्या सुरक्षेवर विशेष भर दिला. तलावाच्या प्रवेशद्वारावर सुरक्षा रक्षक नेमणे, नागरिकांच्या सुविधेसाठी लॉकर बॉक्स उपलब्ध करून देणे आणि महिला प्रसाधनगृहात एक्झॉस्ट फॅन बसवण्याच्या सूचना त्यांनी दिल्या. वीज बचतीसाठी या ठिकाणी सोलर पॅनल बसवण्यात येणार असून लहान मुलांच्या बेबी टँकभोवती सुरक्षिततेसाठी रेलिंग बसवण्याचे आदेशही त्यांनी दिले.

लॉन टेनिस कोर्टच्या शेजारील मोकळ्या जागेचा वापर करून तिथे क्रिकेटसाठी टर्फ तयार करण्याचा निर्णय यावेळी घेण्यात आला. मैदानाभोवतीच्या वाळलेल्या झाडांच्या फांद्या कापण्यासाठी उद्यान विभागाशी त्वरित पत्रव्यवहार करण्याच्या सूचना देण्यात आल्या. रात्रीच्या वेळी खेळाडूंना सराव करता यावा यासाठी हायमास्ट दिवे बसवण्यावरही चर्चा झाली. प्रबोधनकार ठाकरे व्यायामशाळेची पाहणी करताना, ओपन जिमची आवश्यक ती दुरुस्ती करण्याच्या सूचना सभापती कुटे यांनी दिल्या. आकाश काळभोर व्यायामशाळेतील मोकळ्या जागेत नवीन बांधकाम किंवा शेड मारुन जागेचा विस्तार करण्याचे नियोजन आहे.

नागरीकांना दर्जेदार सुविधा मिळणे हाच मुख्य उद्देश

''काळभोरनगर येथील शंकर शेट्टी उद्यानासह शहरातील ज्येष्ठ नागरिकांसाठी विरंगुळा केंद्र आणि शेड उभारण्याचे प्रस्तावित आहे. उद्यानात ओपन जिमच्या दुरुस्तीसाठी ठेकेदाराचा क्रमांक दर्शनी भागात लावण्याचे आदेश देण्यात आले, जेणेकरुन नागरिक तक्रार करु शकतील. विशेष म्हणजे, बागेत बसवण्यात आलेल्या वाय-फाय बॉक्सची माहिती घेऊन नागरिकांना वायफाय सुविधा उपलब्ध करुन देणे आणि उद्यानांमध्ये तब्बल १००० नवीन बाके (बेंच) खरेदी करण्याबाबत उद्यान विभागाला कळविण्यात आले आहे.

नागरिकांना आणि खेळाडूंना उत्तम दर्जाच्या सुविधा मिळणे हा आमचा मुख्य उद्देश आहे. या दौऱ्यात आढळलेल्या त्रुटी दूर करून तातडीने विकासकामे पूर्ण केली जातील.''

– कैलास कुटे, सभापती, क्रिडा समितीपिंपरी-चिंचवड महापालिकेच्या विविध क्रिडा प्रकल्पांचा दर्जा सुधारण्यासाठी आणि नागरिकांना अद्यया पिंपरी-चिंचवड महापालिकेच्या विविध क्रिडा प्रकल्पांचा दर्जा सुधारण्यासाठी आणि नागरिकांना अद्यया