माजी पंतप्रधान भारतरत्न राजीव गांधी यांना पुण्यतिथीनिमित्त पिंपरी चिंचवड महानगरपालिकेच्या वतीने अभिवादन
May 21 2026
4माजी पंतप्रधान भारतरत्न राजीव गांधी यांना पुण्यतिथीनिमित्त पिंपरी चिंचवड महानगरपालिकेच्या वतीने अभिवादन
अधिकारी, कर्मचाऱ्यांनी दहशतवाद व हिंसाचार विरोधी शपथ घेऊन केला सामाजिक एकता जपण्याचा निर्धार
पिंपरी, ता. २१- "आम्ही भारताचे नागरिक, आपल्या देशाच्या अहिंसा व सहिष्णुतेच्या परंपरेविषयी दृढ निष्ठा बाळगून या द्वारे, सर्व प्रकारच्या दहशतवादाचा व हिंसाचाराचा आमच्या सर्व शक्तीनिशी मुकाबला करण्याची गांभिर्यपूर्वक प्रतिज्ञा करत आहोत. तसेच आम्ही सर्व मानवजातींमध्ये शांती, सामाजिक एकोपा आणि सामंजस्य टिकवू व वर्धिष्णू करू आणि मानवी जीवित मूल्ये धोक्यात आणणाऱ्या या विघटनकारी शक्तींचा प्रतिकार करू, अशी शपथ महानगरपालिकेच्या पदाधिकारी, अधिकारी, कर्मचारी यांच्यासह शेकडो युवकांनी घेतली. यावेळी देशातील दहशतवाद व हिंसाचार विरोधात एकत्र येऊन देशाच्या अखंडतेसाठी लढा देण्याचा निर्धारही उपस्थितांनी व्यक्त केला.
पिंपरी-चिंचवड महानगरपालिकेच्या वतीने भारताचे माजी पंतप्रधान भारतरत्न राजीव गांधी यांच्या पुण्यतिथी निमित्त महापालिकेच्या मुख्य प्रशासकीय इमारतीमधील त्यांच्या प्रतिमेस महापौर रवि लांडगे यांनी पुष्पहार अर्पण करुन अभिवादन केले.
अभिवादनाच्या वेळी उपमहापौर शर्मिला बाबर, सहशहर अभियंता बापूसाहेब गायकवाड, जनता संपर्क अधिकारी प्रफुल्ल पुराणिक यांच्यासह महानगरपालिका कर्मचारी, सामाजिक कार्यकर्ते व नागरिक उपस्थित होते.
माजी पंतप्रधान भारतरत्न राजीव गांधी यांचा पुण्यतिथी दिवस हा दरवर्षी दहशतवाद व हिंसाचार विरोधी दिन म्हणून पाळला जातो. तसेच या दिवशी दहशतवाद व हिंसाचार विरोधी शपथ देखील घेतली जाते. त्या अनुषंगाने उपस्थितांनी आज दहशतवाद व हिंसाचार विरोधी शपथ घेतली. प्रफुल्ल पुराणिक यांनी शपथेचे वाचन केले.
May 21 2026
