पुण्यात १६ ऑक्टोबरला मतदार यादी निरीक्षकांचा दौरा; तक्रारी मांडण्याची संधी

पुणे | १५ ऑक्टोबर २०२६ : पुणे जिल्ह्यातील मतदारांसाठी महत्त्वाची माहिती समोर आली आहे. मतदार यादीच्या विशेष सखोल पुनरीक्षण कार्यक्रमांतर्गत शुक्रवार, १६ ऑक्टोबर २०२६ रोजी मतदार यादी निरीक्षक पुणे जिल्ह्याच्या दौऱ्यावर येणार आहेत. या भेटीदरम्यान मतदार नोंदणी आणि मतदार यादीसंदर्भातील अडचणी व तक्रारी मांडण्याची संधी नागरिकांना उपलब्ध होणार आहे.

१ ऑक्टोबर २०२६ या अर्हता दिनांकावर आधारित मतदार यादीच्या विशेष सखोल पुनरीक्षण कार्यक्रमासाठी पुणे विभागीय आयुक्तांची मतदार यादी निरीक्षक म्हणून नियुक्ती करण्यात आली आहे. मतदार यादीतील सुधारणांबाबत आवश्यक उपाययोजना सुचविणे आणि त्यासंदर्भातील अहवाल निवडणूक आयोगाला सादर करणे, ही निरीक्षकांची जबाबदारी असणार आहे.

या कार्यक्रमांतर्गत तीन टप्प्यांमध्ये मतदार यादीची पडताळणी केली जाणार आहे. यामध्ये दावे व हरकती दाखल करण्याचा कालावधी, प्राप्त दावे निकाली काढण्याचा कालावधी आणि मतदार यादीच्या अंतिम प्रसिद्धीचा टप्पा यांचा समावेश आहे.

निरीक्षकांच्या जिल्हा दौऱ्यादरम्यान १६ ऑक्टोबर रोजी दुपारी ३.३० वाजता पुणे जिल्हाधिकारी कार्यालयातील पाचव्या मजल्यावरील सभागृहात मतदार नोंदणी अधिकारी आणि सहाय्यक मतदार नोंदणी अधिकारी यांची बैठक आयोजित करण्यात आली आहे.

दरम्यान, नागरिकांच्या मतदार नोंदणी आणि मतदार यादीसंदर्भातील तक्रारी स्वीकारण्यासाठी स्वतंत्र अधिकाऱ्याची नियुक्ती करण्यात आली आहे. नागरिकांनी आपल्या तक्रारी आणि अडचणी संबंधित अधिकाऱ्यांकडे मांडाव्यात, असे आवाहन जिल्हा प्रशासनाकडून करण्यात आले आहे.

विशेष म्हणजे, मतदार यादी निरीक्षकांच्या दौऱ्याव्यतिरिक्त इतर दिवशीही नागरिकांना तक्रारी नोंदविता येणार आहेत. त्यासाठी भारत निवडणूक आयोगाचे NGRS पोर्टल तसेच जिल्हास्तरीय कॉल सेंटरचा १९५० हा हेल्पलाइन क्रमांक उपलब्ध करून देण्यात आला आहे.

मतदार नोंदणी किंवा मतदार यादीसंदर्भात अडचणी असलेल्या नागरिकांनी या सुविधांचा लाभ घ्यावा, असे आवाहन प्रशासनाने केले आहे.