आळंदीत ६ वर्षांच्या चिमुकलीसह ज्येष्ठ महिलेची निर्घृण हत्या

पिंपरी, ता. २ - आळंदी परिसरात गुरुवारी (ता. २) एक धक्कादायक घटना घडली आहे. सहा वर्षीय चिमुकली आणि ७५ वर्षीय ज्येष्ठ महिलेची अज्ञात व्यक्तीने निर्घृण हत्या केल्याने परिसरात एकच खळबळ उडाली आहे. धनश्री केदारी आणि संगीता शिंदे अशी मृतांची नावे आहेत.

धनश्रीची आजी संगीता केदारी या रुग्णालयात हाऊसकीपिंगचे काम करतात. काल बुधवारी (ता. १) रात्री त्यांनी नात धनश्रीला शेजारी राहणाऱ्या संगीता शिंदे यांच्या घरी झोपायला सोडले होते. मात्र, आज गुरुवारी सकाळी त्या परत आल्यावर दोघींचीही हत्या झाल्याचे उघड झाले. अज्ञात व्यक्तीने बोथट हत्याराने हा हल्ला केल्याची प्राथमिक माहिती समोर येत आहे.

घटनेची माहिती मिळताच पोलिस आणि फॉरेन्सिक पथक घटनास्थळी दाखल झाले असून तपासाला वेग आला आहे. डॉग स्कॉडच्या मदतीने आरोपीचा मागोवा घेतला जात आहे. आरोपीच्या शोधासाठी विशेष पथके रवाना करण्यात आली आहेत. या दुहेरी हत्याकांडामुळे संपूर्ण परिसरात भीती आणि संतापाचे वातावरण पसरले आहे.