प्रशासनाकडून नदीपात्र स्वच्छतेची विशेष मोहिम तातडीने राबवणार - अभिषेक बारणे

थेरगाव येथील नदी प्रदूषणाची स्थायी समिती सभापती अभिषेक बारणे यांच्याकडून पाहणी

पिंपरी, ता. १ - थेरगाव येथील नदी प्रदूषणाच्या वाढत्या समस्येची गंभीर दखल घेऊन पिंपरी-चिंचवड महानगरपालिकेचे स्थायी समिती सभापती अभिषेक बारणे यांनी आज बुधवारी (ता. १) महापालिका अधिकाऱ्यांसोबत प्रत्यक्ष पाहणी केली. प्रदूषण करणाऱ्यांवर तात्काळ कठोर कारवाई करण्याचे निर्देश त्यांनी यावेळी दिले. प्रशासनाकडून नदीपात्र स्वच्छतेची विशेष मोहिम तातडीने राबवण्यात येईल, असे बारणे यांनी यावेळी सांगितले.

सभापती अभिषेक बारणे यांनी पर्यावरण विभागाचे वरिष्ठ अधिकारी आणि ‘ग’ क्षेत्रीय अधिकाऱ्यांसोबत थेरगाव बोट क्लब परिसराचा सविस्तर आढावा घेतला. यावेळी नदीपात्रात साचलेला कचरा, प्रक्रीया न करता सोडले जाणारे सांडपाणी आणि औद्योगिक प्रदुषणामुळे निर्माण झालेली भीषण परिस्थिती समोर आली. या प्रदूषणामुळे परिसरातील नागरिकांचे आरोग्य, शेती आणि नदीतील जैवविविधता धोक्यात आल्याबद्दल त्यांनी तीव्र नाराजी व्यक्त केली.

या पाहणी दौऱ्यात नदी स्वच्छ ठेवण्यासाठी कायमस्वरुपी उपाययोजना करण्याच्या आणि कचरा टाकणाऱ्यांवर सीसीटीव्हीच्या माध्यमातून लक्ष ठेवण्याच्या सूचनाही सभापतींनी संबंधित अधिकाऱ्यांना दिल्या आहेत.

नदीपात्र स्वच्छतेची विशेष मोहीम तातडीने

"पवना नदीचे प्रदूषण ही आपल्या सर्वांसाठी चिंतेची बाब आहे. आमदार शंकरभाऊ जगताप यांच्या मार्गदर्शनाखाली आम्ही शहराचा पर्यावरण समतोल राखण्यासाठी कटिबद्ध आहोत. नदीपात्रात कचरा टाकणाऱ्यांवर आणि बेकायदेशीरपणे सांडपाणी सोडणाऱ्यांवर आता केवळ दंड करून थांबणार नाही, तर त्यांच्यावर कठोर कायदेशीर कारवाई करण्याचे आदेश मी प्रशासनाला दिले आहेत. प्रशासनाकडून नदीपात्र स्वच्छतेची विशेष मोहीम तातडीने राबवण्यात येईल."

- अभिषेक बारणे, सभापती, स्थायी समिती