Nov 01 2026
वाकड : पोलिसांत तक्रार केल्याच्या कारणावरून एका व्यक्तीला लाकडी काठीने तसेच लाथाबुक्क्यांनी मारहाण केल्याप्रकरणी वाकड पोलीस ठाण्यात तिघांविरुद्ध गुन्हा दाखल करण्यात आला आहे. या प्रकरणात साहिल हरिदास शिंदे आणि अजय शिंदे यांना अटक करण्यात आल्याची माहिती पिंपरी-चिंचवड पोलिसांनी प्रसिद्धिपत्रकातून दिली आहे.
भरत बन्सी कांबळे (वय ४१, रा. म्हातोबानगर, वाकड) यांनी याप्रकरणी फिर्याद दिली आहे. कांबळे यांचा वाहनांच्या खरेदी-विक्रीचा व्यवसाय आहे. त्यांच्या तक्रारीवरून साहिल हरिदास शिंदे, अजय शिंदे आणि त्यांच्यासोबत असलेल्या एका अनोळखी व्यक्तीविरुद्ध गुन्हा नोंदविण्यात आला आहे.
पोलिसांच्या प्रसिद्धिपत्रकानुसार, म्हातोबानगर येथील सम्राट चौक परिसरात कांबळे यांच्या राहत्या घरासमोर हा प्रकार घडला. साहिलने कांबळे यांना, “तू माझी तक्रार पोलिसांना का करतोस,” अशी विचारणा केल्याचे फिर्यादीत म्हटले आहे. त्यानंतर त्याने लाकडी काठीने मारहाण केल्याचा आरोप आहे.
अजय शिंदे आणि त्याच्यासोबत असलेल्या अनोळखी व्यक्तीने कांबळे यांना शिवीगाळ करून लाथाबुक्क्यांनी मारहाण केल्याचेही तक्रारीत नमूद आहे. या मारहाणीत कांबळे यांच्या डाव्या हाताच्या मनगटाजवळ फ्रॅक्चर होऊन दुखापत झाल्याची नोंद पोलिसांच्या प्रसिद्धिपत्रकात करण्यात आली आहे.
भांडण सोडविण्यासाठी आलेल्या एका महिलेलाही शिवीगाळ करण्यात आल्याचे प्रसिद्धिपत्रकात म्हटले आहे.
याप्रकरणी भारतीय न्याय संहितेच्या कलम ११८(२), ११५(२), ३५२ आणि ३(५) अन्वये गुन्हा दाखल करण्यात आला आहे. सहायक पोलीस निरीक्षक भोकरे या प्रकरणाचा तपास करीत आहेत.
May 12 2026
