Sep 17 2026
भांबोली | 16 सप्टेंबर 2026 : पिंपरी-चिंचवड पोलीस आयुक्तालय, पुणे शहर पोलीस आयुक्तालय आणि पुणे जिल्ह्याच्या हद्दीतून दोन वर्षांसाठी तडीपार करण्यात आलेला 30 वर्षीय आरोपी तडीपारीचा आदेश अस्तित्वात असतानाही भांबोली परिसरात आढळला. त्याच्या जवळ कोयताही मिळून आल्याचे पोलिसांनी सांगितले. याप्रकरणी उत्तर महाळुंगे पोलीस ठाण्यात गुन्हा दाखल करून आरोपीला अटक करण्यात आली आहे.
पोलिसांनी दिलेल्या माहितीनुसार, ही घटना 15 सप्टेंबर रोजी रात्री 9.20 वाजण्याच्या सुमारास भांबोली, ता. खेड येथे श्रावण हॉटेलच्या पाठीमागे, सिग्मा कंपनीकडे जाणाऱ्या रस्त्याच्या बाजूला घडली.
या प्रकरणी संतोष वायकर (पोलीस शिपाई, ब. नं. 2255, नेमणूक उत्तर महाळुंगे एमआयडीसी पोलीस ठाणे, पिंपरी-चिंचवड पोलीस आयुक्तालय) यांनी फिर्याद दिली आहे.
आरोपी आकाश बाळासाहेब शेळके (वय 30, रा. कोरेगाव खुर्द, ता. खेड, जि. पुणे) याला पोलिसांनी अटक केली आहे.
पोलीस उपायुक्त, परिमंडळ 3 यांच्या 11 एप्रिल 2025 रोजीच्या तडीपार आदेश क्रमांक 51/2025 अन्वये आरोपीला महाराष्ट्र पोलीस अधिनियमाच्या कलम 55 प्रमाणे पिंपरी-चिंचवड पोलीस आयुक्तालय हद्द, पुणे शहर पोलीस आयुक्तालय हद्द आणि पुणे जिल्ह्यातून दोन वर्षांसाठी तडीपार करण्यात आले होते.
हा आदेश लागू असतानाही आरोपी भांबोली परिसरात आला. यावेळी तो कोयता जवळ बाळगलेल्या अवस्थेत पोलिसांना मिळून आल्याचा आरोप आहे.
याप्रकरणी उत्तर महाळुंगे पोलीस ठाण्यात गुन्हा क्रमांक 77/2026 अंतर्गत महाराष्ट्र पोलीस अधिनियमाच्या कलम 142 तसेच शस्त्र अधिनियमाच्या कलम 4(25) प्रमाणे गुन्हा दाखल करण्यात आला आहे.
May 12 2026
