Sep 15 2026
वाकड | 15 सप्टेंबर 2026 : गणपती खरेदीसाठी कुटुंबासह काळेवाडी फाटा परिसरात आलेल्या महिलेच्या मुलीच्या गळ्यातील सुमारे 70 हजार रुपये किमतीची सोनसाखळी हिसकावून नेल्याची घटना घडली. या प्रकरणी वाकड पोलिसांनी जबरी चोरीचा गुन्हा नोंदवून आरोपीचा शोध सुरू केला आहे.
या प्रकरणी थेरगाव येथील एका ३० वर्षीय महिलेने फिर्याद दिली असून गोरख दशरथ सुखळे वय ४० रा. भोसरी याच्यावर गुन्हा दाखल करण्यात आला आहे.
ही घटना 14 सप्टेंबर रोजी सकाळी साडेबारा वाजण्याच्या सुमारास सांगवी वाहतूक विभागाच्या समोरील परिसरात घडली. फिर्यादी महिला कुटुंबासह गणपतीची खरेदी करण्यासाठी स्टॉलवर गेल्या होत्या. गर्दीचा फायदा घेत एका अनोळखी व्यक्तीने त्यांच्या मुलीच्या गळ्यातील सोन्याची चेन हिसकावून नेल्याचे तक्रारीत म्हटले आहे.
पोलिसांनी दिलेल्या वर्णनानुसार, आरोपी अंदाजे 40 वर्षांचा असून त्याचा रंग सावळा आणि शरीरयष्टी मजबूत आहे. तो सुमारे पाच फूट पाच इंच उंचीचा असून त्याने पांढरा शर्ट आणि काळ्या रंगाची फुल पँट परिधान केली होती. आरोपीने गर्दीतून संधी साधत सोनसाखळी हिसकावून पलायन केल्याची शक्यता पोलिसांनी व्यक्त केली आहे.
सणासुदीच्या काळात बाजारपेठांमध्ये खरेदीसाठी मोठी गर्दी होत असते. अशा वेळी सोन्याचे दागिने घातलेल्या महिला आणि मुलांवर चोरट्यांची नजर असण्याची शक्यता असते. या पार्श्वभूमीवर नागरिकांनी खरेदीच्या ठिकाणी सतर्कता बाळगावी, गर्दीमध्ये मौल्यवान वस्तूंची काळजी घ्यावी आणि संशयास्पद हालचाली दिसल्यास तत्काळ पोलिसांना माहिती द्यावी, असे आवाहन करण्यात आले आहे.
वाकड पोलिसांनी परिसरातील सीसीटीव्ही कॅमेऱ्यांचे चित्रण तपासण्यास सुरुवात केली आहे. आरोपीची ओळख पटवण्यासाठी तांत्रिक तपासही केला जात आहे. चोरीनंतर आरोपी कोणत्या दिशेने गेला, याची माहिती घेतली जात आहे.
या प्रकरणी वाकड पोलीस ठाण्यात गुन्हा क्रमांक 562/2026 नोंदवण्यात आला आहे. भारतीय न्याय संहितेतील जबरी चोरीसंबंधीच्या तरतुदीनुसार पुढील तपास सुरू आहे.
May 12 2026
