Sep 13 2026
पिंपरी | 12 सप्टेंबर 2026 : कर्ज मिळवून देण्याचे आमिष दाखवून एका चालकाचा मोबाइल आणि कागदपत्रे घेतल्यानंतर त्याच्या नावाने ई-मेल आयडी तयार करून विविध लोन अॅप्समधून कर्ज काढल्याचा प्रकार समोर आला आहे. या माध्यमातून सुमारे 2 लाख रुपयांची आर्थिक फसवणूक झाल्याची तक्रार दापोडी पोलीस ठाण्यात दाखल करण्यात आली आहे.
अनिल महेंद्र काकडे (वय 51, व्यवसाय—चालक, रा. नेहरूनगर, पिंपरी) यांनी याबाबत फिर्याद दिली आहे. ही घटना 4 जून 2026 रोजी सकाळी 10:30 ते सायंकाळी 6:30 या वेळेत नाशिक फाटा परिसरातील हॉटेल अशोका येथे घडल्याचे तक्रारीत म्हटले आहे.
तक्रारीनुसार, आरोपीने कर्ज करून देण्याचे आश्वासन देत फिर्यादीचा मोबाइल आणि आवश्यक कागदपत्रे ताब्यात घेतली. त्यानंतर फिर्यादीच्या नावाने गुगल ई-मेल आयडी तयार केल्याचा आरोप आहे.
मोबाइलचा गैरवापर करून ‘मनीव्ह्यू’, ‘फाइब’ आणि ‘ट्रॅडोफिना’ या लोन अॅप्समधून कर्जाची रक्कम मंजूर करून घेण्यात आली. ही रक्कम फिर्यादीच्या बँक खात्यांमधून तसेच अन्य खात्यांमध्ये परस्पर वर्ग करण्यात आल्याचे तक्रारीत नमूद आहे.
तक्रारीनुसार, विविध व्यवहारांद्वारे फिर्यादीची सुमारे 2 लाख रुपयांची आर्थिक फसवणूक झाली. या प्रकरणात मोबाइल, कागदपत्रे आणि डिजिटल ओळखीचा गैरवापर झाल्याचा आरोप करण्यात आला आहे.
याप्रकरणी दापोडी पोलीस ठाण्यात गुन्हा क्रमांक 302/2026 नोंदवण्यात आला आहे. भारतीय न्याय संहितेतील फसवणूक व विश्वासघातासंबंधीच्या कलमांन्वये गुन्हा दाखल असून, पोलीस पुढील तपास करत आहेत.
May 12 2026
