Sep 13 2026
पिंपरी-चिंचवड | 13 सप्टेंबर 2026 : सेबी नोंदणीकृत असल्याचे कथित प्रमाणपत्र दाखवून शेअर बाजारात मोठा नफा मिळवून देण्याचे आमिष देत मोशीतील एका व्यक्तीकडून 1 कोटी 6 लाख 75 हजार रुपये गुंतवून घेतल्याचा प्रकार समोर आला आहे. गुंतवणुकीची मूळ रक्कम आणि दाखवलेला नफा परत न दिल्याच्या तक्रारीवरून पिंपरी-चिंचवड सायबर पोलिसांनी गुन्हा नोंदवला आहे.
जनार्दन बाळकृष्ण जगदाळे (वय 54, रा. वुड्स व्हिला, फेज 1, मोशी) यांनी फिर्याद दिली आहे. 10 नोव्हेंबर 2025 ते 11 सप्टेंबर 2026 या कालावधीत हा प्रकार ऑनलाइन माध्यमातून घडल्याचे तक्रारीत म्हटले आहे.
तक्रारीनुसार, आरोपींनी फिर्यादीशी ऑनलाइन संपर्क साधून ते एका ब्रोकरेज कंपनीचे एजंट असल्याचे सांगितले. संबंधित कंपनी सेबीकडे नोंदणीकृत असल्याचे कथित प्रमाणपत्र दाखवून फिर्यादीचा विश्वास संपादन केल्याचा आरोप आहे.
फिर्यादीला शेअर्स खरेदीमध्ये चांगला नफा मिळवून देण्याचे आश्वासन देण्यात आले. त्यानंतर कंपनीच्या नावाने डिमॅट खाते उघडण्यास सांगून वेगवेगळ्या कंपन्यांचे शेअर्स खरेदी करण्यासाठी वेळोवेळी रक्कम भरण्यास प्रवृत्त करण्यात आल्याचे तक्रारीत नमूद आहे.
या प्रक्रियेत फिर्यादीने एकूण 1 कोटी 6 लाख 75 हजार रुपये गुंतवले. आरोपींनी व्हॉट्सअॅपवर मोठा नफा झाल्याचे दाखवून गुंतवणूक सुरू ठेवण्यास प्रवृत्त केल्याचा आरोप आहे.
फिर्यादीने नफा आणि मूळ रक्कम परत मागितल्यानंतर ती देण्यात आली नसल्याचे तक्रारीत म्हटले आहे. याप्रकरणी आयुष पटेल, निरज मित्रा, अनुकभाई पटेल आणि त्यांच्या साथीदारांविरोधात तक्रार दाखल करण्यात आली आहे.
सायबर पोलीस ठाण्यात गुन्हा क्रमांक 40/2026 नोंदवण्यात आला आहे. भारतीय न्याय संहितेतील फसवणूक, विश्वासघात व संगणकविषयक गुन्ह्यांसह माहिती तंत्रज्ञान अधिनियमातील संबंधित कलमांन्वये पुढील तपास सुरू आहे.
May 12 2026
