Nov 13 2026
निघोजे | १३ नोव्हेंबर २०२६ : पुणे जिल्ह्यातील खेड तालुक्यातील निघोजे परिसरात एका मजुराची मोटारसायकल अडवून त्याला धमकावत दहा हजार रुपये किमतीचा मोबाईल जबरदस्तीने हिसकावून घेतल्याची घटना समोर आली आहे. महिंद्रा कंपनीच्या गेट क्रमांक दोनजवळ हा प्रकार घडला असून, याप्रकरणी महाळुंगे एमआयडीसी पोलीस ठाण्यात दोन आरोपींविरोधात गुन्हा दाखल करण्यात आला आहे. यातील एका आरोपीला पोलिसांनी अटक केली आहे.
पोलिसांनी दिलेल्या माहितीनुसार, ही घटना ११ नोव्हेंबर २०२६ रोजी रात्री ११ वाजून ४५ मिनिटांच्या सुमारास निघोजे येथील महिंद्रा कंपनीच्या गेट क्रमांक दोनच्या बाजूला, सुभाषवाडी परिसरात घडली.
या प्रकरणी दिलदार शेख (वय २८ वर्षे, व्यवसाय मजुरी) यांनी फिर्याद दिली आहे.
या गुन्ह्यातील आरोपी मनोज आलोक शिंदे (वय ३४ वर्षे, देहूगाव ) असा आहे. तर दुसरा आरोपी सुनील पाटील ( राहणार देहूगाव) यांच्यावर गुन्हा दाखल करण्यात आला आहे.
फिर्यादीने दिलेल्या तक्रारीनुसार, घटनेच्या वेळी आरोपी क्रमांक एक आणि दोन हे त्यांच्या मोटारसायकलवरून आले. त्यांनी फिर्यादीच्या मोटारसायकलीला अडवून त्यांना धाक दाखवला. त्यानंतर 'तुझ्याकडे जे काही आहे ते काढ', असे म्हणत फिर्यादीच्या खिशातील १० हजार रुपये किमतीचा मोबाईल जबरदस्तीने काढून घेतल्याचे फिर्यादीत नमूद आहे.
या घटनेनंतर फिर्यादीने महाळुंगे एमआयडीसी पोलीस ठाण्यात तक्रार दाखल केली. त्यानुसार १२ नोव्हेंबर २०२६ रोजी पहाटे ३ वाजून ३३ मिनिटांनी गुन्हा नोंदवण्यात आला.
याप्रकरणी गुन्हा रजिस्टर क्रमांक ११८/२०२६ अन्वये भारतीय न्याय संहिता कलम ३०९(४) आणि ३(५) नुसार गुन्हा दाखल करण्यात आला आहे.
या गुन्ह्यातील आरोपी क्रमांक एक मनोज आलोक शिंदे याला अटक करण्यात आली आहे. या प्रकरणाचा पुढील तपास पोलीस उपनिरीक्षक धुळे करीत आहेत.
May 12 2026
