महापालिका भवनामध्ये विविध विभागांना आयुक्त डॉ. विजय सूर्यवंशी यांची भेट

महापालिका भवनामध्ये विविध विभागांना आयुक्त डॉ. विजय सूर्यवंशी यांची भेट    

प्रशासकीय कामकाज अधिक कार्यक्षम, पारदर्शक आणि नागरिकाभिमुख करण्याच्या अधिकाऱ्यांना सूचना 

पिंपरी, ता. १८ - पिंपरी-चिंचवड महानगरपालिकेचे नवनियुक्त आयुक्त डॉ. विजय सूर्यवंशी यांनी बुधवारी (ता. १८) महानगरपालिकेच्या मुख्य प्रशासकीय भवनातील विविध विभागांना भेट देत कामकाजाची सखोल पाहणी केली. या पाहणीमध्ये प्रशासकीय कामकाज अधिक कार्यक्षम, पारदर्शक आणि नागरिकाभिमुख करण्याच्या दृष्टीने त्यांनी संबंधित अधिकाऱ्यांना विविध सूचना दिल्या.

आयुक्तांसोबत उपसंचालक किशोर गोखले, सहआयुक्त मनोज लोणकर, मुख्य अभियंता प्रमोद ओंभासे, सहशहर अभियंता सुनील भागवानी, बापू गायकवाड, अनिल भालसाखळे, उपायुक्त राजेश आगळे, सचिन पवार, चेतना केरुरे, विशेष अधिकारी किरण गायकवाड, जनता संपर्क अधिकारी प्रफुल्ल पुराणिक यांच्यासह विविध विभागांचे विभागप्रमुख, अधिकारी व कर्मचारी उपस्थित होते.

आयुक्त डॉ. सूर्यवंशी यांनी प्रत्येक विभागातील दैनंदिन कामकाज, प्रलंबित विषय, नागरिकांकडून येणाऱ्या तक्रारी व त्यावर करण्यात येणारी कार्यवाही याबाबत सविस्तर माहिती घेतली. तसेच अधिकारी व कर्मचाऱ्यांशी थेट संवाद साधत कामातील अडचणी, आवश्यक मनुष्यबळ, तांत्रिक सुविधा यांचा आढावा घेतला. प्रशासनातील कामकाज अधिक सुटसुटीत आणि गतिमान करण्यासाठी विभागीय पातळीवर समन्वय वाढविण्याच्या सूचना दिल्या.

 कार्यालयीन जागा अधिक सुव्यवस्थित, स्वच्छ आणि कामकाजास पूरक राहील, यासाठी जुन्या फाईल्स व अनावश्यक कागदपत्रांचे गठ्ठे तत्काळ हटविण्याच्या सूचना त्यांनी केल्या. डिजिटल पद्धतींचा अधिकाधिक वापर करुन कागदविरहित कामकाज वाढविण्यावर भर द्यावा, असे त्यांनी सांगितले.  

कर्मचाऱ्यांसाठी सकारात्मक आणि प्रेरणादायी कार्यपरिसर निर्माण करणे तसेच नागरिकांना कार्यालयात येताना सुलभ आणि विश्वासार्ह सेवा अनुभव मिळणे अत्यंत महत्त्वाचे आहे. कार्यालयीन वातावरण सुधारल्यास कामकाजाची गुणवत्ता वाढते आणि नागरीकांना समाधान वाटते, असे आयुक्त म्हणाले. 

शिस्तबद्ध आणि वेळेवर कामकाज होण्यासाठी सर्व अधिकारी व कर्मचाऱ्यांनी वेळेवर उपस्थित राहणे बंधनकारक आहे, असे आयुक्तांनी स्पष्ट केले. यासोबतच, पुढील पंधरा दिवसांनी पुन्हा एकदा सर्व विभागांची पाहणी करुन दिलेल्या सूचनांची अंमलबजावणी झाल्याबाबत खातरजमा करण्यात येणार असल्याचेही त्यांनी सांगितले. मुख्य प्रशासकीय इमारतीच्या पाहणीनंतर महानगरपालिकेच्या सर्व क्षेत्रीय कार्यालयांची देखील लवकरच पाहणी करण्यात येईल, असे आयुक्तांनी सांगितले.