Nov 09 2026
खेड | ९ नोव्हेंबर २०२६ : पुणे जिल्ह्यातील खेड तालुक्यातील वासुली गावात दारू पिण्यासाठी पैसे न दिल्याच्या कारणावरून पतीने पत्नीला शिवीगाळ करत बेदम मारहाण केल्याची धक्कादायक घटना समोर आली आहे. या मारहाणीत महिलेच्या डाव्या हाताला गंभीर दुखापत होऊन फ्रॅक्चर झाल्याचे तक्रारीत नमूद करण्यात आले आहे. तसेच पतीने पत्नीला जिवे मारण्याची धमकी दिल्याचेही समोर आले आहे. याप्रकरणी उत्तर महाळुंगे पोलीस ठाण्यात पतीविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, या प्रकरणी एका महिलेने फिर्याद दिली आहे. फिर्यादी महिलेचा पती भागवत संतराम काटे (वय ४८ वर्षे, वासुली गाव, ता. खेड, जि. पुणे, मूळगाव घराटवाडी, ता. माजलगाव, जि. बीड) याच्याविरोधात गुन्हा दाखल करण्यात आला आहे.
ही घटना २६ ऑक्टोबर २०२६ रोजी सायंकाळी साडेसात वाजल्यापासून ७ नोव्हेंबर २०२६ रोजी सकाळी सात वाजेपर्यंतच्या कालावधीत वासुली गावातील पाचपुते यांच्या रूममध्ये, आरवी हॉटेलजवळ घडल्याचे तक्रारीत नमूद आहे.
फिर्यादी महिलेने दिलेल्या तक्रारीनुसार, आरोपी पतीने दारू पिण्यासाठी तिच्याकडे पैशांची मागणी केली होती. मात्र, पत्नीने पैसे देण्यास नकार दिल्याने आरोपीला राग आला. त्यानंतर त्याने पत्नीला शिवीगाळ करत हाताने मारहाण केली.
मारहाणीदरम्यान आरोपीने पत्नीला खाली पाडले आणि तिच्या डाव्या हातावर जोरजोरात मारहाण केली. या मारहाणीमुळे महिलेच्या डाव्या हाताला फ्रॅक्चर झाले. तसेच आरोपीने तिला जखमी केल्याचे फिर्यादीत म्हटले आहे.
एवढ्यावरच न थांबता आरोपीने राहत्या घरीही पत्नीला शिवीगाळ करून हाताने मारहाण केली. तसेच तिला जिवे मारण्याची धमकी दिल्याचे तक्रारीत नमूद करण्यात आले आहे.
या प्रकारानंतर महिलेने उत्तर महाळुंगे पोलीस ठाण्यात धाव घेत तक्रार दाखल केली. त्यानुसार ७ नोव्हेंबर २०२६ रोजी दुपारी २ वाजून २२ मिनिटांनी गुन्ह्याची नोंद करण्यात आली.
या प्रकरणी भारतीय न्याय संहिता २०२३ मधील कलम ११७(२), ११५(२), ३५१(२) आणि ३५२ अन्वये गुन्हा दाखल करण्यात आला आहे.
या प्रकरणाचा पुढील तपास पोलीस हवालदार चाफळे करीत आहेत.
May 12 2026
