महाळुंगे एमआयडीसीत तरुणावर तिघांचा जीवघेणा हल्ला; गुन्हा दाखल

महाळुंगे | १५ नोव्हेंबर २०२६ : पुणे जिल्ह्यातील खेड तालुक्यातील सावरदरी परिसरात कंपनीतील काम संपवून खोलीकडे जाणाऱ्या २५ वर्षीय तरुणाला तिघांनी अडवून बेदम मारहाण केल्याची घटना समोर आली आहे. आरोपींनी तरुणाला शिवीगाळ आणि जीवे मारण्याची धमकी देत लाकडी दांडका, काळ्या रंगाची वायर आणि लाथाबुक्क्यांनी मारहाण केली. तसेच डोक्यावर लाकडी दांडक्याने जोरदार हल्ला करून गंभीर जखमी केल्याचे फिर्यादीत नमूद आहे. याप्रकरणी उत्तर महाळुंगे एमआयडीसी पोलीस ठाण्यात तिघांविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, ही घटना १२ नोव्हेंबर २०२६ रोजी सायंकाळी ६ वाजून १५ मिनिटांच्या सुमारास सावरदरी गावाच्या हद्दीत घडली. स्पार्क मिंडा कंपनीच्या गेटपासून कच्च्या रस्त्याने सुमारे १०० मीटर अंतरावर ही मारहाणीची घटना घडली.

या प्रकरणी रोहित रोशनलाल नकले (वय २५ वर्षे,राहणार सावरदरी, तालुका खेड, जिल्हा पुणे) यांनी फिर्याद दिली आहे.

या गुन्ह्यातील आरोपी सुरज दवणे आणि त्याचे दोन साथीदार आहेत. दोन साथीदारांपैकी एकाने लाल रंगाचा शर्ट, तर दुसऱ्याने पिवळ्या रंगाचा शर्ट घातला होता, असे पोलीस नोंदीत नमूद आहे.

फिर्यादीने दिलेल्या तक्रारीनुसार, रोहित नकले हे कंपनीतील काम संपल्यानंतर सावरदरी गावाच्या दिशेने त्यांच्या खोलीकडे जात होते. स्पार्क मिंडा कंपनीच्या गेटपासून कच्च्या रस्त्याने सुमारे १०० मीटर अंतरावर गेल्यानंतर सुरज दवणे आणि त्याच्या दोन साथीदारांनी त्यांना अडवले.

तक्रारीनुसार, सुरज दवणे याने फिर्यादीच्या पत्नीला लाईनवरून जाऊ दिले नाही, तिला का अडवले, असे विचारल्याच्या कारणावरून सुरज दवणे आणि त्याच्या दोन साथीदारांनी संगनमत करून फिर्यादीला अडवले.

त्यानंतर आरोपींनी रोहित नकले यांना शिवीगाळ करून जीवे मारण्याची धमकी दिली. तसेच लाकडी दांडका, काळ्या रंगाची वायर आणि लाथाबुक्क्यांनी मारहाण केल्याचे फिर्यादीत नमूद करण्यात आले आहे.

यावेळी सुरज दवणे याने फिर्यादीला जीवे मारण्याच्या उद्देशाने त्यांच्या डोक्यावर लाकडी दांडक्याने जोरदार हल्ला केला. या हल्ल्यात रोहित नकले गंभीर जखमी झाल्याचे तक्रारीत म्हटले आहे.

या घटनेनंतर रोहित नकले यांनी उत्तर महाळुंगे एमआयडीसी पोलीस ठाण्यात तक्रार दाखल केली. त्यानुसार गुन्हा रजिस्टर क्रमांक २२७/२०२६ अन्वये भारतीय न्याय संहिता २०२३ चे कलम १०९(१), ११७(२), ११५(२), ३५१(२), ३५२ आणि ३(५) नुसार गुन्हा दाखल करण्यात आला आहे.

या प्रकरणाचा पुढील तपास पोलीस उपनिरीक्षक सचिन महाडीक करीत आहेत.