Sep 25 2026
पुणे | २५ सप्टेंबर २०२६ : महाराष्ट्र विधान परिषदेच्या पुणे विभाग पदवीधर आणि शिक्षक मतदारसंघासाठी पात्र मतदारांना मतदार यादीत नाव नोंदविण्यासाठी २६ सप्टेंबरपर्यंत मुदत आहे. अद्याप नोंदणी न केलेल्या पात्र पदवीधर आणि शिक्षकांनी मुदतीपूर्वी नोंदणी पूर्ण करावी, असे आवाहन जिल्हाधिकारी जितेंद्र डुडी यांनी केले आहे.
पुणे विभाग पदवीधर आणि शिक्षक मतदारसंघाच्या निवडणुकीची प्रक्रिया सुरू आहे. भारत निवडणूक आयोगाने जाहीर केलेल्या कार्यक्रमानुसार या दोन्ही मतदारसंघांसाठी २३ ऑक्टोबर २०२६ रोजी मतदान होणार आहे.
पात्र मतदारांसाठी ऑनलाइन नोंदणीची सुविधाही उपलब्ध करून देण्यात आली आहे. पदवीधर मतदारसंघासाठी पात्र पदवीधरांनी आवश्यक कागदपत्रांसह नमुना १८, तर शिक्षक मतदारसंघासाठी पात्र शिक्षकांनी नमुना १९ नुसार अर्ज करावा. शिक्षक मतदारांसाठी संबंधित संस्थेच्या प्रमुखांचे प्रमाणपत्र आवश्यक असल्याचे प्रशासनाने स्पष्ट केले आहे.
या प्रक्रियेची माहिती आणि ऑनलाइन नोंदणीची सुविधा मुख्य निवडणूक अधिकारी, महाराष्ट्र यांच्या mahaelection.gov.in या संकेतस्थळावर उपलब्ध आहे. त्यामुळे पात्र नागरिकांना कार्यालयात जाण्याऐवजी ऑनलाइन पद्धतीनेही अर्ज सादर करता येणार आहे.
मतदार नोंदणीसाठी पात्र असलेल्या नागरिकांनी शेवटच्या दिवसाची वाट न पाहता शक्य तितक्या लवकर अर्ज सादर करावा. मतदार यादीत नाव नोंदविणे ही निवडणूक प्रक्रियेत सहभागी होण्यासाठी महत्त्वाची बाब असून पात्र पदवीधर आणि शिक्षकांनी या संधीचा लाभ घ्यावा, असे आवाहन जिल्हाधिकारी जितेंद्र डुडी यांनी केले आहे.
दरम्यान, पुणे विभाग पदवीधर आणि शिक्षक मतदारसंघासह राज्यातील पाच विधान परिषद मतदारसंघांसाठी निवडणूक कार्यक्रम जाहीर झाला असून संबंधित मतदारसंघांमध्ये आदर्श आचारसंहिता लागू झाली आहे.
May 12 2026
