आयुक्तांची 'सावली' निवारा केंद्राला भेट ; बेघर व्यक्तींसोबत साजरी केली दिवाळी

पिंपरी-चिंचवड : दिवाळी म्हणजे आनंद, उत्साह आणि आपल्या कुटुंबासोबत साजरा होणारा जिव्हाळ्याचा सण. मात्र, कुटुंबीयांपासून दुरावलेल्या आणि निराधार अवस्थेत जीवन जगणाऱ्या व्यक्तींसाठी हा सण एकटेपणाची जाणीव करून देणारा असतो. अशाच व्यक्तींच्या आयुष्यात आनंदाचे क्षण निर्माण करण्यासाठी पिंपरी-चिंचवड महापालिकेचे आयुक्त विजय सूर्यवंशी यांनी पिंपरीतील ‘सावली’ निवारा केंद्रातील ७५ बेघर व्यक्तींसोबत दिवाळी साजरी केली.

महापालिकेच्या समाज विकास विभागाच्या माध्यमातून आणि ‘रिअल लाइफ रिअल पीपल’ या संस्थेच्या सहकार्याने सावली निवारा केंद्र चालविण्यात येते. रस्त्यावर निराधार अवस्थेत आढळलेल्या, नातेवाईकांपासून दुरावलेल्या तसेच मानसिक आणि शारीरिक आजारांनी त्रस्त असलेल्या व्यक्तींना या केंद्रात सुरक्षित निवारा, अन्न, औषधोपचार आणि आवश्यक देखभाल सुविधा उपलब्ध करून दिल्या जातात.

यावेळी आयुक्तांनी लाभार्थ्यांसोबत फराळ केला. प्रत्येकाशी संवाद साधून त्यांच्या राहणीमानाची,आरोग्याची आणि केंद्रातून मिळणाऱ्या सुविधांची माहिती जाणून घेतली. संवादादरम्यान काही लाभार्थ्यांनी आपल्या आयुष्यातील संघर्ष आणि कठीण प्रसंग सांगितले. त्यांच्या अनुभवांविषयी जाणून घेताना आयुक्त भावूक झाले.

यावेळी त्यांनी निराधार व्यक्तींना पुन्हा जगण्याचा आधार देण्यासाठी सावली केंद्राकडून सुरू असलेल्या कार्याबद्दल समाधान व्यक्त केले. याशिवाय त्यांनी संस्थेच्या पदाधिकाऱ्यांकडून केंद्राच्या दैनंदिन कामकाजाची, लाभार्थ्यांना पुरविण्यात येणाऱ्या सुविधांची आणि संस्थेला भेडसावणाऱ्या अडचणींची माहिती घेतली.

तसेच केंद्रातील कर्मचाऱ्यांकडून लाभार्थ्यांची घेतली जाणारी काळजी, त्यांना दिला जाणारा सन्मान आणि आपुलकीच्या वातावरणाचेही आयुक्तांनी कौतुक केले. दरम्यान, आयुक्तांनी केंद्रातील स्थापत्यविषयक समस्या सोडविण्यासाठी आवश्यक उपाययोजना करण्याच्या सूचना महापालिका अधिकाऱ्यांना दिल्या आहेत.

याप्रसंगी महापालिकेचे उपायुक्त अण्णा बोदडे, जनसंपर्क अधिकारी प्रफुल्ल पुराणिक, रिअल लाइफ रिअल पीपल संस्थेचे एम. ए. हुसैन, व्यवस्थापक गौतम थोरात आणि समाजसेवक ॲग्नस फ्रान्सिस यांच्यासह संबंधित पदाधिकारी उपस्थित होते.

यावेळी बोलताना आयुक्त म्हणाले , “प्रत्येक व्यक्तीला केवळ अन्न, वस्त्र आणि निवारा मिळणे पुरेसे नाही, तर त्यांना प्रेम, आपुलकी आणि सन्मानाची वागणूक मिळणेही तितकेच महत्त्वाचे आहे.” सावली निवारा केंद्राच्या माध्यमातून निराधार आणि वंचित व्यक्तींना आधार देण्याचे महत्त्वपूर्ण काम सुरू असल्याचे सांगत त्यांनी संस्थेच्या उपक्रमाचे कौतुक केले. केंद्रातील प्रत्येक लाभार्थ्याची काळजी घेणे ही सामाजिक जबाबदारी असल्याचेही त्यांनी स्पष्ट केले.

दिवाळीनिमित्त आयुक्तांनी दिलेल्या या भेटीमुळे सावली निवारा केंद्रातील लाभार्थ्यांना आनंदाचे क्षण अनुभवता आले. दिवाळीच्या निमित्ताने झालेल्या या भेटीतून सामाजिक बांधिलकी, आपुलकी आणि माणुसकीचा संदेश देण्यात आला.