Oct 31 2026
निगडी | ३० ऑक्टोबर २०२६ : पिंपरी-चिंचवडमधील निगडी परिसरात PUBG मोबाईल गेम खेळताना फोन केल्यामुळे खेळात व्यत्यय आल्याच्या कारणावरून एका २७ वर्षीय तरुणाला मारहाण केल्याची घटना समोर आली आहे. आरोपींनी तरुणाला शिवीगाळ करून लाथाबुक्क्यांनी मारहाण केली. तसेच लाकडी दांडक्याने डोक्यात मारून जखमी केल्याचा आरोप आहे. या घटनेत तरुणाच्या ॲपल कंपनीच्या मोबाईलचेही नुकसान झाले आहे.
पोलिसांनी दिलेल्या माहितीनुसार, ही घटना २२ ऑक्टोबर २०२६ रोजी रात्री ११ वाजून ३० मिनिटांच्या सुमारास निगडीतील साईनाथनगर, मशिदीजवळील श्रीकृष्ण मंदिरासमोर घडली.
या प्रकरणी प्रशांत रमेश यादव (वय २७ वर्षे, प्राधिकरण, निगडी, पुणे) यांनी फिर्याद दिली आहे.
फिर्यादीच्या तक्रारीनुसार, त्यांचे ओळखीचे आरोपी PUBG गेम खेळत असताना फिर्यादीने त्यांना फोन केला होता. त्यामुळे गेम खेळण्यात व्यत्यय आल्याचा राग आरोपींना आला.
याच कारणावरून आरोपींनी फिर्यादीशी वाद घालत त्यांना शिवीगाळ करण्यास सुरुवात केली.
या प्रकरणात तन्मय संपत झांबरे (वय २३ वर्षे, साईनाथनगर, निगडी, पुणे) आणि त्याचा १९ वर्षीय अनोळखी मित्र यांच्याविरोधात गुन्हा दाखल करण्यात आला आहे.
फिर्यादीच्या आरोपानुसार, दोघांनी त्यांना लाथाबुक्क्यांनी मारहाण केली. तसेच लाकडी दांडक्याने डोक्यात मारून जखमी केले.
मारहाणीदरम्यान आरोपींनी फिर्यादीचा ॲपल कंपनीचा मोबाईल फोन जमिनीवर आपटून त्याचे नुकसान केल्याचे तक्रारीत नमूद करण्यात आले आहे.
या घटनेनंतर प्रशांत यादव यांनी निगडी पोलीस ठाण्यात तक्रार दिली.
याप्रकरणी निगडी पोलीस ठाण्यात गुन्हा क्रमांक ९९३/२०२६ दाखल करण्यात आला आहे.
आरोपींविरोधात भारतीय न्याय संहिता २०२३ मधील कलम ११८(१), ११५(२), ३५२, ३५१(२), ३२४(३) आणि ३(५) अन्वये गुन्हा नोंदविण्यात आला आहे.
या प्रकरणाचा पुढील तपास निगडी पोलीस करीत आहेत.
May 12 2026
