Sep 13 2026
पिंपरी-चिंचवड | 12 सप्टेंबर 2026 : गुन्हे शाखेच्या युनिट 4 ने कॉपर चोरीच्या प्रकरणांत कारवाई करत एकूण 9 गुन्ह्यांची उकल केली आहे. कारवाईत कॉपर, चारचाकी वाहन, मोटारसायकल, केबल वायर, ग्राइंडर मशीन आणि रेग्युलेटर असा एकूण ₹19 लाख 84 हजार 500 किमतीचा मुद्देमाल जप्त करण्यात आला आहे.
पोलीस आयुक्त विनयकुमार चौबे यांच्या आदेशानुसार युनिट 4 चे पथक 11 सप्टेंबर रोजी गुन्हे प्रतिबंधक पेट्रोलिंग करत होते. त्यावेळी मिळालेल्या गुप्त माहितीच्या आधारे सहायक पोलीस उपनिरीक्षक राजाराम लोणकर आणि पोलीस अंमलदारांनी कारवाई केली.
पोलिसांनी जयाराम विक्रम सावळे, सूरज जालिंदर फड, सचिन जालिंदर फड, मोहम्मद रियाज मोहम्मद बशीर सलमानी, मनोज संतोषी चौधरी आणि अनजकुमार रामकृपाल गौतम यांना ताब्यात घेतल्याचे प्रेस नोटमध्ये नमूद आहे. त्यांच्याकडून संशयित कॉपर मुद्देमालासह चारचाकी वाहन जप्त करण्यात आले. या कारवाईत ₹18 लाख 74 हजारांचा मुद्देमाल हस्तगत झाल्याची माहिती पोलिसांनी दिली.
चौकशीदरम्यान तळेगाव एमआयडीसी परिसरात डीपीमधील कॉपर वायर व केबल चोरी केल्याचे संबंधितांनी सांगितल्याचे पोलिसांनी म्हटले आहे. या माहितीच्या आधारे पोलिसांनी चोरीच्या ठिकाणांची पाहणी केली. तळेगाव एमआयडीसी पोलीस ठाण्यातील सहा आणि चिखली पोलीस ठाण्यातील दोन गुन्ह्यांची उकल झाल्याचे नमूद करण्यात आले आहे.
याच तपासात सीसीटीव्ही फुटेजच्या आधारे अजयर प्रल्हाद गायकवाड (वय 50) याला ताब्यात घेण्यात आले. त्याच्याकडून मदरबोर्ड केबल वायर, दोन ग्राइंडर मशीन, दोन रेग्युलेटर आणि गुन्ह्यात वापरलेली मोटारसायकल असा ₹1 लाख 10 हजार 500 किमतीचा मुद्देमाल जप्त करण्यात आला.
ही कारवाई पोलीस आयुक्त विनयकुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त सारंग आवाड, पोलीस उपआयुक्त गुन्हे रोहिदास पवार आणि वरिष्ठ पोलीस निरीक्षक अर्जुन घोडेपाटील यांच्या मार्गदर्शनाखाली करण्यात आली.
Sep 13 2026
