चुलत भावाच्या घरातील १ लाख २९ हजार रुपयांच्या सोन्या-चांदीच्या दागिन्यांची व रोख रक्कमेची चोरी

पिंपरी, ता. १२ - भाऊ व त्याचे कुटुंब घरात नसल्याचा फायदा घेत एका तरुणाने आपल्या चुलत भावाच्या घरातून १ लाख २९ हजार ५०० रुपयांचे सोन्या-चांदीचे दागिने व रोख रक्कम चोरली. ही घटना सोमवारी (ता. ११) मनोहरनगर, तळेगाव दाभाडे येथे घडली आहे.

याबाबत, सुरज विजयकुमार गायकवाड यांनी तक्रार दिली आहे. ते तळेगाव दाभाडे परिसरात भाडेतत्वावरील घरात राहतात.सोमवारी गायकवाड व त्यांच्या पत्नी कामावर असताना त्यांचा चुलत भाऊ, उत्तम गायकवाड (वय ४०, रा. जि. बिदर, कर्नाटक) हा घरी आला. त्याने उघड्या लोखंडी कपाटाच्या लॉकरमधून एकूण १,२९,५००/- रुपये किंमतीचे सोन्या-चांदीचे दागिने व रोख रक्कम चोरी केली.

सुरज गायकवाड यांनी तळेगाव दाभाडे पोलीस ठाण्यात तक्रार दाखल केली असून, पोलिस तपास करत आहेत. या प्रकरणी आरोपीवर भारतीय न्याय संहिता कलम ३०५ आणि भारतीय दंड विधान कलम ३८० प्रमाणे गुन्हा नोंद करण्यात आला आहे, असे पोलिसांनी सांगितले.