Sep 20 2026
चिखली | 19 सप्टेंबर 2026 : स्वतःला टेलिकॉम, सीबीआय, आरबीआय आणि पोलीस अधिकारी असल्याचे भासवून ‘डिजिटल अरेस्ट’ची भीती दाखवत 59 वर्षीय व्यक्तीची तब्बल 10 लाख रुपयांची आर्थिक फसवणूक करण्यात आली आहे. याप्रकरणी चिखली पोलीस ठाण्यात अनोळखी व्यक्तींविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, मनोज कुमार उपाध्याय (वय 59, मोरेवस्ती, चिखली, पुणे) यांनी फिर्याद दिली आहे. हा प्रकार 11 सप्टेंबर ते 16 सप्टेंबर 2026 या कालावधीत घडला.
फिर्यादी यांना अनोळखी व्यक्तींनी वेगवेगळ्या मोबाईल क्रमांकांवरून व्हॉट्सॲपवर व्हिडिओ कॉल केला. कॉल करणाऱ्यांनी स्वतःला टेलिकॉम, सीबीआय, आरबीआय आणि पोलीस अधिकारी असल्याचे भासवले. त्यानंतर फिर्यादीला ‘डिजिटल अरेस्ट’ची भीती दाखवण्यात आली.
या भीतीचा फायदा घेत अनोळखी व्यक्तींनी फिर्यादीला IDFC FIRST Bank च्या एका खात्यावर पैसे पाठवण्यास भाग पाडले. त्यानुसार फिर्यादीने एकूण 10 लाख रुपये संबंधित खात्यावर पाठवले. त्यानंतर आपली आर्थिक फसवणूक झाल्याचे लक्षात आल्यावर त्यांनी पोलिसांकडे तक्रार दिली.
याप्रकरणी चिखली पोलीस ठाण्यात भारतीय न्याय संहितेच्या संबंधित कलमांसह आयटी ॲक्ट अंतर्गत गुन्हा दाखल करण्यात आला असून पुढील तपास पोलीस करत आहेत.
May 12 2026
