'शिवरुद्र शंभुराजे' महानाट्य हे छत्रपती संभाजी महाराजांचा इतिहास युवा पिढीपर्यंत पोहोचविणारा स्तुत्य उपक्रम - आमदार अमित गोरखे

'शिवरुद्र शंभुराजे' महानाट्य हे छत्रपती संभाजी महाराजांचा इतिहास युवा पिढीपर्यंत पोहोचविणारा स्तुत्य उपक्रम - आमदार अमित गोरखे

गुरुवारी (ता. १४ मे) छत्रपती संभाजी महाराज यांच्या जयंतीदिनी विविध कार्यक्रमांचे आयोजन

पिंपरी, ता. १२ - ''छत्रपती संभाजी महाराज यांचे शौर्य, पराक्रम आणि स्वराज्यासाठीचे योगदान सर्वश्रुत असले तरी युवा पिढी आणि शालेय विद्यार्थ्यांना त्यांचा इतिहास जिवंत स्वरूपात अनुभवता यावा, या उद्देशाने पिंपरी चिंचवड महानगरपालिकेच्या वतीने महानाट्याचे भव्य आयोजन करण्यात आले आहे ही कौतुकास्पद बाब आहे. अत्यंत नियोजनबद्ध पद्धतीने आयोजित करण्यात आलेल्या या कार्यक्रमाला नागरिकांचा मोठा प्रतिसाद मिळत असून परिसरात उत्साहाचे वातावरण निर्माण झाले आहे. तरी प्रत्येकाने आपल्या परिसरातील जास्तीत जास्त नागरिकांना अशा कार्यक्रमाला उपस्थित राहण्यासाठी प्रोत्साहित करावे जेणेकरून प्रत्येकापर्यंत हा इतिहास जीवंतपणे अनुभवण्याची संधी मिळेल.'', असे आवाहन आमदार अमित गोरखे यांनी केले.

 छत्रपती संभाजी महाराज यांच्या अद्वितीय पराक्रमाची, राष्ट्रनिष्ठेची आणि स्वराज्य रक्षणासाठी दिलेल्या बलिदानाची जाज्वल्य गाथेचा इतिहास उलगडणाऱ्या ‘शिवरूद्र शंभुराजे’या भव्य महानाट्याच्या दुसऱ्या प्रयोगास काल प्रारंभ झाला, यावेळी आमदार अमित गोरखे हे बोलत होते. काल झालेल्या महानाट्याच्या कार्यक्रमास नगरसदस्य तुषार हिंगे, कुशाग्र कदम, अनुराधा गोरखे, सुप्रिया चांदगुडे, उप आयुक्त अण्णा बोदडे, जनता संपर्क अधिकारी प्रफुल्ल पुराणिक, सामाजिक कार्यकर्ते सागर तापकीर, राजेंद्र घावटे,संजय कुरबेट्टी, हेमा पारिसकर,जितेंद्र छाबडा यांच्यासह विविध सामाजिक संघटनांचे प्रतिनिधी आणि नागरिक मोठ्या संख्येने उपस्थित होते.

आमदार अमित गोरखे म्हणाले, ''छत्रपती संभाजी महाराज यांच्या जन्मोत्सवानिमित्त महानगरपालिका, प्रभागातील नगरसदस्य आणि विविध सामाजिक संघटनांच्या सहकार्याने अतिशय स्तुत्य आणि प्रेरणादायी उपक्रम राबविण्यात आला आहे. या उपक्रमाच्या यशस्वी आयोजनामध्ये सामाजिक संघटनांचा देखील सहभाग असून त्यांचे कौतुक करावे तेवढे कमी आहे. तसेच पिंपरी चिंचवड शहरामध्ये इतिहास घडविणारा आणि ऐतिहासिक ठरणारा हा सांस्कृतिक उपक्रम सर्व लोकप्रतिनिधींच्या सहकार्याने सुरू झाला असून तो भविष्यातही अखंडपणे सुरु राहील.'' 

१० ते १४ मे २०२६ या कालावधीत चिंचवड येथील बर्ड व्हॅली उद्यान येथे छत्रपती संभाजी महाराज यांच्या जयंतीनिमित्त विचार प्रबोधन पर्वाचे आयोजन करण्यात आले आहे. या प्रबोधन पर्वाअंतर्गत ११ ते १३ मे २०२६ यादरम्यान शिपस्पर्श शिवसह्याद्री प्रतिष्ठान निर्मित ‘शिवरूद्र शंभुराजे’ या महानाट्याचे सादरीकरण होत आहे. इंडिया बुक ऑफ रेकॉर्ड होल्डर असलेले हे महानाट्य ॲड. विनय चंद्रकांत दाभाडे लिखित व दिग्दर्शित असून  प्रतिक चंद्रकांत दाभाडे यांनी सहदिग्दर्शन केले आहे.  तीन मजली भव्य रंगमंच, २०० हून अधिक कलाकारांचा सहभाग, थरारक लढाईचे प्रसंग तसेच महाराष्ट्रातील विविध लोककलांचा समावेश असलेल्या या महानाट्यातून छत्रपती संभाजी महाराजांचा संघर्षमय जीवनप्रवास प्रभावीपणे उभा करण्यात आला आहे. संभाजीनगर, चिंचवड येथील बर्ड व्हॅली उद्यानाच्या मागील बाजूस शिवशंभो उद्यानासमोर असलेल्या मोकळ्या मैदानात सायंकाळी ७ ते रात्री १० या वेळेत हे महानाट्य रंगत आहे. छत्रपती संभाजी महाराज यांचा प्रेरणादायी इतिहास नव्या पिढीपर्यंत पोहोचविणे, स्वराज्याच्या विचारांचे संवर्धन करणे आणि इतिहासाबाबत जनजागृती घडवून आणणे हा या महानाट्याच्या आयोजनामागील प्रमुख उद्देश आहे.

छत्रपती संभाजी महाराज यांच्या जयंतीदिनाचे  कार्यक्रम - 

- गुरुवारी (ता. १४ मे) छत्रपती संभाजी महाराज यांच्या जयंती निमित्त विविध कार्यक्रमाद्वारे त्यांना अभिवादन करण्यात येणार आहे. सकाळी १०.३० वाजता महानगरपालिकेच्या पिंपरी येथील मुख्य प्रशासकीय इमारतीमध्ये छत्रपती संभाजी महाराज यांच्या प्रतिमेस तर १०.४५ वाजता बर्ड व्हॅली येथील त्यांच्या पुतळ्यास महापौर रवि लांडगे यांच्या हस्ते पुष्पहार अर्पण करून अभिवादन करण्यात येणार आहे.या कार्यक्रमास खासदार, आमदार, महापालिकेचे पदाधिकारी,अधिकारी,सामाजिक कार्यकर्ते व नागरिक उपस्थित राहणार आहेत. 

- सायंकाळी ५ वाजता शिवशाहीर सुरेश सुर्यवंशी आसंगीकर यांचा छत्रपती संभाजी महाराज यांच्या जीवनावर आधारित शाहीरीचा कार्यक्रम तर सायंकाळी ७ वाजता सुप्रसिद्ध व्याख्याते नितीन बानगुडे पाटील यांचे "छत्रपती संभाजी महाराज-एक अद्वितीय योध्दे" या विषयावर व्याख्यान होणार आहे.

या सर्व कार्यक्रमांना शहरवासियांनी उपस्थित रहावे असे आवाहन महानगरपालिकेचे महापौर रवी लांडगे यांनी केले आहे.