दुचाकी दुभाजकाला धडकून तरुणाचा मृत्यू; एक जण गंभीर जखमी

रावेत | 19 सप्टेंबर 2026 : भरधाव दुचाकी रस्त्यावरील दुभाजकाला जोरात धडकल्याने झालेल्या अपघातात 18 वर्षीय तरुण गंभीर जखमी झाला, तर दुचाकी चालवणाऱ्या त्याच्या 19 वर्षीय मित्राचा मृत्यू झाला. ही घटना 18 सप्टेंबर रोजी दुपारी दोनच्या सुमारास इस्कॉन मंदिराजवळील पीसीसीओई कॉलेज आकुर्डी गेट क्रमांक 3 जवळ, प्रकाशाई सोसायटीजवळ घडली.

पोलिसांनी दिलेल्या माहितीनुसार, यश सुनील आव्हाड (वय 18, शिक्षण, रा. तुळजाभवानी सोसायटीजवळ, म्हस्के वस्ती, रावेत, ता. हवेली, जि. पुणे; मूळ रा. रेटरे, जि. सातारा) याने फिर्याद दिली आहे. शशांक अनंत लांडगे (वय 19, रा. तुळजाभवानी सोसायटीजवळ, म्हस्के वस्ती, रावेत, ता. हवेली, जि. पुणे) असे मृत तरुणाचे नाव आहे.

फिर्यादी आणि मृत शशांक हे दोघे मित्र होते. घटनेच्या वेळी शशांक हा मोटारसायकल चालवत होता. पोलिसांच्या नोंदीनुसार, शशांकने मोटारसायकल हयगयीने, भरधाव वेगात आणि वाहतुकीच्या नियमांकडे दुर्लक्ष करून चालवली.

दरम्यान, दुचाकी रस्त्यावरील डिव्हायडरला जोरात धडकली. या अपघातात यश आव्हाड याला गंभीर दुखापत झाली. तसेच दुचाकी चालवणाऱ्या शशांक लांडगे यालाही गंभीर दुखापत झाली आणि त्याचा मृत्यू झाला.

याप्रकरणी रावेत पोलीस ठाण्यात 19 सप्टेंबर रोजी गुन्हा दाखल करण्यात आला असून पुढील तपास पोलीस करत आहेत.