रेल्वेच्या मावळ लोकसभा मतदारसंघातील विकासकामांबाबत खासदार श्रीरंग बारणे यांची रेल्वे अधिकाऱ्यांसोबत बैठक

 रेल्वेच्या  मावळ लोकसभा मतदारसंघातील विकासकामांबाबत खासदार श्रीरंग बारणे यांची रेल्वे अधिकाऱ्यांसोबत बैठक

पिंपरी, ता. २९ - मावळ लोकसभा मतदारसंघातील पर्यटननगरी असलेल्या लोणावळ्यात रेल्वे प्रवाशांना वाहने लावण्यासाठी जागा अपुरी पडत आहे. रेल्वे स्टेशन लगत जागा उपलब्ध आहे. या जागेची पाहणी करुन तेथे वाहनतळ विकसित करावे. त्यामुळे पर्यटकांना पार्किंग उपलब्ध होईल, अशी सूचना मावळचे शिवसेना खासदार श्रीरंग बारणे यांनी रेल्वे अधिकाऱ्यांना केली. त्यावर तत्काळ जागेची पाहणी करुन वाहनतळ विकसित करण्याची ग्वाही रेल्वे अधिकाऱ्यांनी दिली.

बुधवारी मध्य रेल्वेच्या मुंबई येथील कार्यालयात मावळ लोकसभा मतदारसंघातील कर्जत रेल्वे स्थानक कॉरिडॉर, स्थानक विस्तारीकरण, रेल्वे स्टॉपेज तसेच पनवेल स्थानक विस्तारीकरण आणि पनवेल रेल्वे मार्गांवरील कामांच्या सद्यस्थितीबाबत महत्त्वपूर्ण बैठक आयोजित करण्यात आली. या बैठकीत प्रवासी सुविधा, स्थानक विकास आणि प्रलंबित कामांना गती देण्यासंदर्भात सविस्तर चर्चा करण्यात आली. या बैठकीस मध्य रेल्वे महाप्रबंधक हिरेशजी मीना उपस्थित होते.  यावेळी रेल्वे प्रवासी संघटनेचे पंकज ओसवाल, पत्रकार विजय मांडे तसेच मध्य रेल्वेचे प्रबंधक  निरज यादव, मंडल वाणिज्य प्रबंधक मुंबई मानस पुरे,  लोणावळा नगरपरिषदचे नगराध्यक्ष राजेंद्र सोनवणे,  आमदार सुनील शेळके उपस्थित होते.

खासदार बारणे म्हणाले, ''पर्यटनगरी असलेल्या लोणावळ्यात रेल्वे प्रवाशांना वाहने लावण्यासाठी जागा अपुरी पडत आहे. रेल्वे स्टेशन लगत जागा उपलब्ध आहे. या जागेची पाहणी करुन तेथे वाहनतळ विकसित करावे. त्यामुळे पर्यटकांना पार्किंग उपलब्ध होईल. रेल्वे अधिकाऱ्यांसाठी असलेल्या निवासस्थान परिसरातील  रस्त्यांची दुरुस्ती करावी. लोणावळ्यात रेल्वे अंतर्गत असलेल्या २५ एकर जागेत रेल्वे म्युझिम करावे. ओव्हर ब्रीजच्या कामाला गती द्यावी. कुमार रिसॉर्टपासून रस्ता बाजारपेठेत जातो. या पुलाचे रुंदीकरण करावे. मैदान विकसित करावे.'' 

''भुशी धरण परिसरात हंगामी स्वरूपाचा पर्यटन व्यवसाय करण्यासाठी स्थानिक नागरिकांनी लावलेल्या दुकानांवर रेल्वे प्रशासनाकडूनअतिक्रमण कारवाई करण्यात आली. या परिसरामध्ये व्यवसाय करणारे स्थानिक नागरिक मागील ४० वर्षांपासून या ठिकाणी चहा, वडापाव, भजी विक्रीचा व्यवसाय करतात. केवळ व्यवसायच नाही तर भुशी धरणावर येणाऱ्या पर्यटकांच्या सुरक्षिततेची काळजी देखील हेच व्यावसायिक घेत असतात. स्थानिक लोकांना रोजगार मिळाला पाहिजे. यासाठी चर्चेतून मार्ग काढावा. रेल्वेची सुरक्षा, स्थानिकांचे हित पाहून समन्वयातून चांगला प्रस्ताव आणावा. स्थानिकांना भाडेतत्वार जागा उपलब्ध करुन द्यावी.'', सूचनाही खासदार बारणे यांनी केली. 

''पनवेल, नेरळ, कर्जत रेल्वे स्टेशनचा अमृत भारत योजनेअंतर्गत विकास करावा.पनवेल ते कर्जत रेल्वे मार्गाचे काम पूर्ण होत आले आहे. येथील जुन्या स्टेशनपासून नवीन कॉरिडॉरला जोडणारा मार्ग तयार करावा.  प्रवाशांना सुविधा द्याव्यात. खंडाळ्यात तिकीट घर करावे.  मुंबई-पुणे बंगळुरु, पुणे हैद्राबाद हाई स्पीड रेल्वे प्रकल्पाचा आराखडा तयार करावा. त्या कामाला गती द्यावी. पुणे ते लोणावळा चौथ्या ट्रॅकच्या कामाला गती द्यावी.'' ''मावळ लोकसभा मतदारसंघातील रेल्वे स्टेशनवर एक्सप्रेस गाड्यांचे थांबे होते. कोरोना काळात हे थांबे बंद केले. त्यानंतर पुन्हा सुरु केले नाहीत. त्यामुळे प्रवाशांचे हाल होत आहेत. त्यासाठी कर्जत रेल्वे स्थानकांवर कोयना एक्सप्रेस, हैद्राबाद, चेन्नई, गढक, सिद्धेश्वर, कोल्हापूर-अहमदाबाद, बंगळुरु-जोधपूर या एक्सप्रेस रेल्वे गाड्यांना थांबे द्यावेत. पुणे-लोणावळा मार्गावरील दुपारी दीड वाजताची लोकल पुन्हा सुरु करावी. मावळातील डोंगरगाव येथील ३४ नंबरचे रेल्वे गेट केवळ १२ तास सुरु असते. हे गेट २४ तास सुरु ठेवावे. नाणे येथील गेट नंबर ४३ सुरु ठेवावे. कामशेत येथे आंदर मावळकडे जाणाऱ्या रस्त्यावर ओव्हर ब्रीज उभारण्यात यावा. पनवेल तालुक्यातील सोमाटणेतील गेट नंबर ७५ येथे अंडर पास तयार करावा. '', अशा सूचना खासदार बारणे यांनी केल्या आहेत.