Oct 23 2026
बावधन | २२ ऑक्टोबर २०२६ : वाहतूक नियमभंगाच्या दंडाची माहिती देणाऱ्या आरटीओ चलानच्या नावाखाली पाठवलेल्या बनावट APK फाइलमुळे बावधनमधील एका व्यक्तीची ४ लाख २ हजार ४१० रुपयांची सायबर फसवणूक झाल्याचा प्रकार समोर आला आहे. व्हॉट्सॲपवर आलेली फाइल उघडल्यानंतर मोबाईलची कार्यप्रणाली बंद पडली आणि त्यानंतर बँक खात्यातून तीन व्यवहारांद्वारे रक्कम काढण्यात आल्याचे फिर्यादीत नमूद आहे.
पोलिसांनी दिलेल्या माहितीनुसार, या प्रकरणी किशोर अप्पासो सुतार (वय ४१ वर्षे, भुकूम, ता. मुळशी, जि. पुणे) यांनी फिर्याद दिली आहे.
४ ऑक्टोबर २०२६ रोजी रात्री ८ वाजण्याच्या सुमारास फिर्यादीच्या मोबाईलवरील व्हॉट्सॲपवर 'RTO Challan.apk' या नावाने एका अज्ञात क्रमांकावरून फाइल आली. या फाइलचे नाव 'RTO eChallan.apk' असे असल्याचेही तक्रारीत नमूद आहे.
आरटीओ चलानशी संबंधित फाइल असल्याचा विश्वास ठेवून फिर्यादीने ती उघडली. मात्र, फाइल उघडताच त्यांच्या मोबाईलची संपूर्ण कार्यप्रणाली बंद पडल्याचे त्यांनी पोलिसांना सांगितले.
त्यानंतर ७ ऑक्टोबर २०२६ रोजी दुपारी २.३५ वाजेपर्यंत फिर्यादीच्या बँक ऑफ महाराष्ट्रच्या कोथरूड शाखेतील खात्यातून तीन आर्थिक व्यवहार झाले. या व्यवहारांमधून एकूण ४,०२,४१० रुपये परस्पर काढण्यात आल्याचा आरोप आहे.
ही घटना ४ ऑक्टोबर ते ७ ऑक्टोबर २०२६ या कालावधीत फिर्यादीच्या राहत्या पत्त्यावर मोबाईलच्या माध्यमातून घडल्याचे तक्रारीत नमूद करण्यात आले आहे.
या प्रकरणी बावधन पोलीस ठाण्यात गुन्हा क्रमांक ६३५/२०२६ नुसार भारतीय न्याय संहिता २०२३ च्या कलम ३१६(२), ३१८(४) तसेच माहिती तंत्रज्ञान अधिनियमातील कलम ६६(सी) आणि ६६(डी) अन्वये अज्ञात व्हॉट्सॲपधारकाविरोधात गुन्हा दाखल करण्यात आला असून, पुढील तपास बावधन पोलीस करीत आहेत.
या घटनेच्या पार्श्वभूमीवर नागरिकांनी आरटीओ चलान किंवा इतर शासकीय सेवांच्या नावाने व्हॉट्सॲपवर येणाऱ्या अनोळखी APK फाइल उघडताना विशेष खबरदारी घेणे आवश्यक आहे.
May 12 2026
