Oct 22 2026
भोसरी | २१ ऑक्टोबर २०२६ : शेअर मार्केटमध्ये पैसे गुंतवल्यास दरमहा २.५ टक्के नफा मिळवून देण्याचे आमिष दाखवून भोसरीतील एका व्यक्तीची ३२ लाख ३० हजार रुपयांची फसवणूक केल्याचा प्रकार समोर आला आहे. या प्रकरणी भोसरी पोलीस ठाण्यात दोन जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, हा प्रकार २३ फेब्रुवारी २०२१ पासून २१ ऑक्टोबर २०२६ पर्यंत भोसरीतील इंद्रायणीनगर परिसरातील यश अँक्लेव्ह, सेक्टर क्रमांक १ येथील पाटील नर्सिंग होम शेजारी घडल्याचे फिर्यादीत नमूद आहे.
या प्रकरणी नितीन निवृत्ती आढळराव (वय ४२ वर्षे, इंद्रायणीनगर, भोसरी, पुणे) यांनी फिर्याद दिली आहे.
गुन्हा दाखल करण्यात आलेल्यांमध्ये अमित भालचंद्र ठाकरे (वय ४५ वर्षे, राहणार पाषाण, पुणे) आणि अमित गिरीश नारखेडे (वय ३५ वर्षे, राहणार बाणेर-बालेवाडी लिंक रोड, पुणे; सध्याचा पत्ता रावेत, पुणे) यांचा समावेश आहे.
फिर्यादीत नमूद केल्यानुसार, आरोपींनी शेअर मार्केटमध्ये पैसे गुंतवून दरमहा अडीच टक्के नफा मिळवून देण्याचे आश्वासन दिले होते. या आश्वासनावर विश्वास ठेवून फिर्यादीने आरोपींकडे एकूण ३५ लाख रुपये गुंतवले.
मात्र, फेब्रुवारी २०२४ नंतर आरोपींनी नफा देणे बंद केले, असे तक्रारीत म्हटले आहे. त्यानंतर फिर्यादीने गुंतवलेली मूळ रक्कम परत मागितली असता त्यांना केवळ २ लाख ७० हजार रुपये परत करण्यात आले.
उर्वरित रक्कम शेअर मार्केटमध्ये गुंतवणूक करून अडीच टक्के परतावा देण्याच्या बहाण्याने स्वतःच्या फायद्यासाठी वापरून ३२ लाख ३० हजार रुपयांची फसवणूक केल्याचा आरोप फिर्यादीने केला आहे.
या प्रकरणी भोसरी पोलीस ठाण्यात गुन्हा क्रमांक ८०१/२०२६ अन्वये भारतीय न्याय संहितेच्या कलम ३१६(२), ३१८(२)(४) आणि ६१ प्रमाणे गुन्हा दाखल करण्यात आला आहे.
या प्रकरणाचा पुढील तपास भोसरी पोलीस करीत आहेत.
May 12 2026
