Oct 22 2026
पिंपरी | २१ ऑक्टोबर २०२६ : पिंपरीतील महात्मा फुले कॉलेजसमोर एका २० वर्षीय तरुणाला पाच जणांनी अडवून रॉड, बांबू आणि हाताने मारहाण केल्याची घटना घडली आहे. या मारहाणीत तरुण जखमी झाला असून, त्याच्या मोबाईलचीही तोडफोड करण्यात आली. याप्रकरणी पिंपरी पोलीस ठाण्यात पाच जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना २१ ऑक्टोबर २०२६ रोजी सकाळी १० वाजण्याच्या सुमारास पिंपरीतील महात्मा फुले कॉलेज परिसरात घडली.
या प्रकरणी गौरव उमेश गुप्ता (वय २० वर्षे, राहणार पिंपरीगाव, पुणे) यांनी फिर्याद दिली आहे.
गुन्हा दाखल करण्यात आलेल्यांमध्ये साहील मनोहर, लकी जावळे, रुपेश मोघेड, सागर गायकवाड (राहणार भोसरी) आणि निशांत अहिरे (राहणार पिंपरी) यांचा समावेश आहे.
फिर्यादीत नमूद केल्यानुसार, गौरव गुप्ता आणि त्यांचा मित्र साकीब अत्तार हे महात्मा फुले कॉलेज येथे टीवायबीकॉमचा पेपर असल्याने साकीबच्या गाडीवरून पेपरसाठी जात होते. कॉलेजच्या बाहेर गाडी लावत असताना अचानक साहील मनोहर आणि त्याच्यासोबतचे इतर चार जण त्यांच्या समोर आले.
यावेळी साहील मनोहर याने गौरव यांना 'तुला परवा खूप मस्ती आली होती', असे म्हणत त्यांच्या भांडणाचा राग मनात धरून त्यांना पकडले. त्यानंतर इतर आरोपींनी गौरव यांच्या हातावर, पाठीवर आणि तोंडावर रॉड, बांबू तसेच हाताने मारहाण केल्याचे फिर्यादीत म्हटले आहे.
मारहाण सुरू असताना साहील मनोहर याने गौरव यांच्या खिशातील मोबाईल काढून रॉडने मोबाईलवर मारून त्याचे नुकसान केल्याचाही आरोप आहे.
गौरव यांचा मित्र साकीब अत्तार हा त्यांना वाचवण्यासाठी आला असता त्यालाही हातावर रॉडने मारून जखमी करण्यात आल्याचे तक्रारीत नमूद आहे.
या प्रकरणी पिंपरी पोलीस ठाण्यात गुन्हा क्रमांक ९६६/२०२६ अन्वये भारतीय न्याय संहिता २०२३ च्या कलम ११८(१), ११५(२), ३५२, ३५१(२), ३२४(४), १८९, १९० आणि १९१(२) प्रमाणे गुन्हा दाखल करण्यात आला आहे.
या प्रकरणाचा पुढील तपास पिंपरी पोलीस करीत आहेत.
May 12 2026
