Oct 22 2026
चाकण | २१ ऑक्टोबर २०२६ : चाकणजवळील खराबवाडी परिसरात जेसीबी कंपनीच्या रोलरखाली सापडून ३२ वर्षीय कामगाराचा मृत्यू झाल्याची घटना घडली आहे. रोलरचालकाने निष्काळजीपणे वाहन चालविल्यामुळे हा अपघात झाल्याचा आरोप असून, याप्रकरणी उत्तर महाळुंगे एमआयडीसी पोलीस ठाण्यात चालकाविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना २० ऑक्टोबर २०२६ रोजी सकाळी ११.३० वाजण्याच्या सुमारास मौजे खराबवाडी गावाच्या हद्दीत, नवीन मदरसन कंपनीच्या ठिकाणी, तालुका खेड, जिल्हा पुणे येथे घडली.
या प्रकरणी संतोष दिलीप होजगे (पोलीस हवालदार, बक्कल क्रमांक २१३५, नेमणूक उत्तर महाळुंगे एमआयडीसी पोलीस ठाणे) यांनी फिर्याद दिली आहे.
गुन्हा दाखल करण्यात आलेल्या आरोपीचे नाव भिमराव यशवंत वैद्य (वय ३३ वर्षे, व्यवसाय रोलरचालक, राहणार चांडोली बुद्रुक, आंबेगाव, जिल्हा पुणे; मूळ राहणार ब्राह्मणवाडा, तालुका सेनगाव, जिल्हा हिंगोली) असे आहे.
फिर्यादीत नमूद केल्यानुसार, आरोपी भिमराव वैद्य हा त्याच्या ताब्यातील जेसीबी कंपनीचा व्हीएम ११७ मॉडेलचा रोलर (क्रमांक MH 14 LE 5875) चालवत होता. यावेळी रहदारीच्या नियमांकडे दुर्लक्ष करून निष्काळजीपणे रोलर चालविल्याने अपघात घडल्याचा आरोप आहे.
या अपघातात रमेश कोकरे (वय ३२ वर्षे) हे रोलरखाली सापडले. त्यांना गंभीर दुखापत झाली आणि त्यांचा मृत्यू झाल्याचे फिर्यादीत म्हटले आहे.
या प्रकरणी उत्तर महाळुंगे एमआयडीसी पोलीस ठाण्यात गुन्हा क्रमांक १८२/२०२६ अन्वये भारतीय न्याय संहिता २०२३ च्या कलम १०६(१) आणि २८१ प्रमाणे गुन्हा दाखल करण्यात आला आहे. या प्रकरणाचा पुढील तपास उत्तर महाळुंगे एमआयडीसी पोलीस करीत आहेत.
May 12 2026
