शाळांजवळील तंबाखू विक्रीवर कारवाई; पिंपरी-चिंचवडमध्ये ७५ पानटपऱ्या हटवल्या

पिंपरी-चिंचवड, दि. १० सप्टेंबर : शाळा आणि महाविद्यालयांच्या १०० मीटर परिसरात तंबाखूजन्य पदार्थ व सिगारेटची विक्री करणाऱ्या ७५ पानटपऱ्यांवर निष्कासनाची कारवाई करण्यात आली आहे. पिंपरी-चिंचवड महानगरपालिकेने पोलीस बंदोबस्तात ही कारवाई केली. मे ते ऑगस्ट २०२६ अखेर राबविण्यात आलेल्या या मोहिमेत पोलीस आयुक्तालयाच्या चारही परिमंडळांतील टपऱ्या हटविण्यात आल्या.

पोलिसांनी दिलेल्या माहितीनुसार, पोलीस आयुक्त विनयकुमार चौबे, सहपोलीस आयुक्त शशिकांत महावरकर, अपर पोलीस आयुक्त सारंग आवाड आणि बसवराज तेली यांनी सर्व पोलीस ठाण्यांना शैक्षणिक संस्थांजवळील तंबाखू विक्री करणाऱ्या टपऱ्यांवर कारवाई करण्याचे आदेश दिले होते. विद्यार्थ्यांच्या आरोग्यावर आणि शैक्षणिक वातावरणावर होणारे दुष्परिणाम रोखण्यासाठी ही मोहीम राबविण्यात आली.

या कारवाईत परिमंडळ एकमधील १७, परिमंडळ दोनमधील १८, परिमंडळ तीनमधील २३ आणि परिमंडळ चारमधील १७ टपऱ्या हटविण्यात आल्या. सर्वाधिक कारवाई परिमंडळ तीनमध्ये झाली असून, चारही परिमंडळांतील कारवाईची एकूण संख्या ७५ आहे. संबंधित पोलीस ठाण्यांचे अधिकारी आणि अंमलदार यांनी महापालिकेच्या पथकांना बंदोबस्त पुरविला.

शाळेत येता-जाता दिसणारी तंबाखूजन्य पदार्थांची आकर्षक पाकिटे आणि मोठ्या मुलांकडून होणारे त्यांचे सेवन यामुळे लहान मुलांमध्ये कुतूहल निर्माण होते. या वयात अनुकरण करण्याची प्रवृत्ती अधिक असल्याने मुले व्यसनाच्या आहारी जाण्याचा धोका वाढतो, असे पोलिसांनी प्रसिद्धिपत्रकात नमूद केले आहे.

तंबाखू सेवनामुळे तोंडाचा कर्करोग, फुप्फुसांचे आजार तसेच मानसिक आणि सामाजिक दुष्परिणाम होऊ शकतात, असेही प्रसिद्धिपत्रकात म्हटले आहे. व्यसनासाठी पैसे मिळविण्याच्या प्रयत्नात चोरी करणे, खोटे बोलणे आणि शाळा बुडविणे अशा सवयी लागण्याची शक्यता पोलिसांनी व्यक्त केली आहे. मुलांच्या आरोग्यावर आणि शिक्षणावर होणारे हे दीर्घकालीन परिणाम टाळण्याच्या उद्देशाने संबंधित टपऱ्यांवर कारवाई करण्यात आली.

शाळांच्या प्रवेशद्वाराजवळ धुराचे लोट, शिवीगाळ आणि गर्दीमुळे शैक्षणिक वातावरण दूषित होते. विशेषतः विद्यार्थिनींमध्ये असुरक्षिततेची भावना निर्माण होऊ शकते, याकडेही पोलिसांनी लक्ष वेधले आहे. विद्यार्थ्यांना सुरक्षित वातावरण मिळावे आणि तंबाखूजन्य पदार्थांच्या संपर्कातून उद्भवणारे धोके कमी व्हावेत, हा या कारवाईमागील उद्देश असल्याचे स्पष्ट करण्यात आले.

चारही परिमंडळांच्या पोलीस उपायुक्तांच्या मार्गदर्शनाखाली संबंधित पोलीस ठाण्यांतील अधिकारी, अंमलदार आणि महापालिकेने संयुक्तपणे ही मोहीम राबविली. नागरिकांचे आरोग्य व सुरक्षिततेला प्राधान्य देत कायदा आणि सुव्यवस्था अबाधित राखण्यासाठी अशा प्रकारची कारवाई यापुढेही सुरू राहणार असल्याची माहिती पोलीस उपायुक्त (गुन्हे) रोहिदास पवार यांच्या १० सप्टेंबरच्या प्रसिद्धिपत्रकातून देण्यात आली आहे