शेअर मार्केटच्या नावाखाली महिलेची ४८.८८ लाखांची फसवणूक

रावेत | २३ ऑक्टोबर २०२६ : ऑनलाइन शेअर मार्केटमध्ये गुंतवणूक करून आर्थिक फायदा मिळवून देण्याच्या आमिषाने रावेत परिसरातील एका महिलेची तब्बल ४८ लाख ८८ हजार ०८५ रुपयांची आर्थिक फसवणूक झाल्याचा प्रकार समोर आला आहे. टेलिग्रामवरील गुंतवणूक ग्रुपमध्ये सहभागी करून महिलेचा विश्वास संपादन करण्यात आला. त्यानंतर विविध बँक खात्यांमध्ये पैसे जमा करून घेण्यात आले. मात्र, गुंतवलेली रक्कम परत न मिळाल्याने महिलेने पोलिसांकडे तक्रार केली आहे.

पोलिसांनी दिलेल्या माहितीनुसार, हा प्रकार ७ सप्टेंबर ते २० ऑक्टोबर २०२६ या कालावधीत घडला. या प्रकरणी एका महिलेने फिर्याद दिली आहे.

फिर्यादी महिला रावेत परिसरातील पुनावळे भागात राहते. ती घरी असताना तिच्या मोबाईलवर टेलिग्राम या सोशल मीडिया ॲपच्या माध्यमातून संपर्क साधण्यात आला. विल्यम ॲनालिस्ट असे नाव सांगणाऱ्या अज्ञात व्यक्तीने तिला ‘शेअर मार्केट A-03’ नावाच्या ग्रुपमध्ये सहभागी केले.

या ग्रुपच्या माध्यमातून फिर्यादीचा विश्वास संपादन करून ऑनलाइन शेअर मार्केटमध्ये गुंतवणूक करण्यास प्रवृत्त करण्यात आले. गुंतवणुकीतून आर्थिक लाभ मिळेल, असे आमिष दाखवून फिर्यादीकडून वेगवेगळ्या बँक खात्यांमध्ये आरटीजीएस आणि ऑनलाइन व्यवहारांद्वारे एकूण ४८,८८,०८५ रुपये जमा करून घेण्यात आले.

या प्रकरणात विल्यम ॲनालिस्ट नावाने संपर्क साधणारी व्यक्ती, टेलिग्रामवरील एका लिंकशी संबंधित अज्ञात महिला, कस्टमर केअरच्या नावाने संपर्क साधणारी अज्ञात व्यक्ती आणि durocapital.rest या संकेतस्थळाचा आरोपी म्हणून उल्लेख करण्यात आला आहे. संबंधित व्यक्तींची संपूर्ण नावे आणि पत्ते अद्याप उपलब्ध नाहीत.

गुंतवणूक केलेली रक्कम परत न मिळाल्याने आपली आर्थिक फसवणूक झाल्याचे फिर्यादीच्या लक्षात आले. त्यानंतर तिने रावेत पोलीस ठाण्यात तक्रार दिली.

या प्रकरणी रावेत पोलीस ठाण्यात गुन्हा क्रमांक ५१३/२०२६ नुसार भारतीय न्याय संहितेच्या कलम ३१८(४), ३१६(२), ३(५) तसेच माहिती तंत्रज्ञान कायद्याच्या कलम ६६(C) आणि ६६(D) अन्वये गुन्हा दाखल करण्यात आला आहे.  या प्रकरणाचा पुढील तपास रावेत पोलीस करत आहेत.