Oct 24 2026
चिंचवड | २२ ऑक्टोबर २०२६ : चिंचवडमधील अजंठानगर येथील तिरंगा हौसिंग सोसायटीत जुन्या भांडणाच्या कारणावरून एका महिलेला मारहाण झाल्याची घटना समोर आली आहे. शेजारी राहणाऱ्या महिलेने फिर्यादीच्या मुलीला शिवीगाळ केली. त्यानंतर झालेल्या वादात फिर्यादीला खाली पाडून मारहाण करण्यात आली. दुसऱ्या आरोपीने फिर्यादीच्या कपाळावर लोखंडी रॉडने वार करून जखमी केल्याचा आरोप आहे.
पोलिसांनी दिलेल्या माहितीनुसार, ही घटना २२ ऑक्टोबर २०२६ रोजी सायंकाळी सुमारे ७ वाजून १० मिनिटांनी हरी ओव्हाळ यांच्या खोलीसमोर, रूम क्रमांक ७१३, तिरंगा हौसिंग सोसायटी, अजंठानगर, चिंचवड येथे घडली.
फिर्यादी महिला हरी ओव्हाळ यांच्या खोलीत राहतात. त्यांच्या घरासमोर जुन्या भांडणाच्या कारणावरून शेजारी राहणाऱ्या महिला आरोपीने फिर्यादीच्या मुलीस पाहून शिवीगाळ केली. या प्रकाराबाबत फिर्यादी महिलेने संबंधित महिलेला जाब विचारला असता त्यांच्यात वाद झाला.
या वादादरम्यान महिला आरोपीने फिर्यादीला खाली पाडून मारहाण केल्याचे तक्रारीत म्हटले आहे. फिर्यादी खाली पडलेल्या असताना पाठीमागून आलेल्या दिलीप ऊर्फ मनोज रतन बंडवाल (वय ३५ वर्षे, व्यवसाय नोकरी, रा. रूम क्रमांक ७१६, तिरंगा हौसिंग सोसायटी, अजंठानगर, चिंचवड) याने फिर्यादीच्या डोक्यात, कपाळावर लोखंडी रॉडने वार करून जखमी केल्याचा आरोप आहे.
तसेच फिर्यादीच्या पतीच्या उजव्या हाताच्या अंगठ्याला जोरात चावा घेऊन जखमी केल्याचे फिर्यादीत नमूद आहे.
या प्रकरणी एका महिलेने फिर्याद दिली आहे. फिर्यादीनुसार एका महिला आरोपीसह दिलीप ऊर्फ मनोज रतन बंडवाल याच्याविरुद्ध गुन्हा दाखल करण्यात आला असून, दिलीप बंडवाल याला अटक करण्यात आली आहे.
निगडी पोलीस ठाण्यात गुन्हा क्रमांक ९५९/२०२६ नुसार भारतीय न्याय संहिता २०२३ मधील कलम ११८(१), ११५(२), ३५२ आणि ३(५) अन्वये गुन्हा दाखल करण्यात आला आहे. या प्रकरणाचा पुढील तपास निगडी पोलीस करत आहेत.
May 12 2026
