Oct 24 2026
पिंपळे गुरव | २३ ऑक्टोबर २०२६ : पिंपरी-चिंचवडमधील पिंपळे गुरव परिसरात दोन जणांमधील भांडण मिटवण्यासाठी गेलेल्या तरुणाला सहा जणांनी बेदम मारहाण केल्याचा प्रकार समोर आला आहे. या मारहाणीत तरुणाच्या डाव्या बाजूच्या डोळ्याला, चेहऱ्याला, उजव्या खांद्याला आणि पायाला दुखापत झाली. तसेच त्याच्या गळ्यातील तीन तोळे वजनाची सोन्याची चेन आणि कानातील पाच ग्रॅम वजनाचा स्टड गहाळ झाल्याची तक्रार करण्यात आली आहे.
या प्रकरणी शैलेश विजय जगताप (वय ३८ वर्षे, विजयराज कॉलनी, अशोका हॉटेलजवळ) यांनी सांगवी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, २३ ऑक्टोबर २०२६ रोजी रात्री साडेबारा वाजण्याच्या सुमारास पिंपळे गुरव येथील रामनगर, ओरना सोसायटी परिसरातील डीटीडीसी कुरिअर कार्यालयासमोर ही घटना घडली.
फिर्यादी हे निलेश भांगरे (वय ४० वर्षे, रा. गजानन नगर, पिंपळे गुरव) आणि प्रज्वल शिर्के (वय २४ वर्षे, रा. एमएच १४ हॉटेलसमोर, कृष्णा चौक, नवी सांगवी) यांच्यातील भांडण मिटवून घेण्यासाठी त्यांना समजावून सांगत होते.
त्याच वेळी निलेश भांगरे, प्रज्वल शिर्के आणि त्यांच्या सोबत असलेल्या चार अनोळखी व्यक्तींनी फिर्यादीसोबत वाद घालून शिवीगाळ केल्याचे तक्रारीत नमूद आहे. त्यानंतर संबंधितांनी हाताने मारहाण केली. तसेच निलेश भांगरे आणि प्रज्वल शिर्के यांनी लाकडी दांडक्याने मारहाण केल्याचा आरोप फिर्यादीने केला आहे.
या मारहाणीत फिर्यादीच्या डाव्या डोळ्याला, चेहऱ्याला, उजव्या खांद्याला, उजव्या पायाच्या गुडघ्याला आणि पायाला जखमा झाल्या. मारहाणीदरम्यान गळ्यातील सोन्याची चेन आणि कानातील स्टड तुटून गहाळ झाल्याचेही फिर्यादीने सांगितले आहे.
या प्रकरणी सांगवी पोलीस ठाण्यात गुन्हा क्रमांक ७१४/२०२६ नुसार भारतीय न्याय संहितेच्या संबंधित कलमांसह महाराष्ट्र पोलीस अधिनियमांतर्गत गुन्हा दाखल करण्यात आला आहे. या घटनेचा पुढील तपास सांगवी पोलीस करत आहेत.
May 12 2026
