Aug 30 2026
दिघी | 30 ऑगस्ट 2026 : सोसायटीच्या बैठकीदरम्यान माजी पदाधिकाऱ्यावर आर्थिक गैरव्यवहाराचा आरोप करत त्यांना हाताने मारहाण करण्यात आली. त्यानंतर सार्वजनिक ठिकाणी जातिवाचक उल्लेख करून अपमान आणि कुटुंबाला धमकी दिल्याचा गंभीर प्रकार दिघीमध्ये घडला. याप्रकरणी सोसायटीच्या तीन पदाधिकाऱ्यांविरोधात संबंधित कायद्यांनुसार गुन्हा दाखल करण्यात आला आहे.
राजू नंदा कांबळे यांनी याबाबत फिर्याद दिली आहे. ही घटना 28 ऑगस्ट 2026 रोजी दुपारी 3:25 वाजता दिघी-आळंदी रस्त्यालगत असलेल्या कमलराज सोसायटीच्या कार्यालयात आणि सोसायटीतील गणपती मंदिरासमोर घडली. गुन्हा 29 ऑगस्ट रोजी रात्री 8:18 वाजता नोंदवण्यात आला.
फिर्यादीनुसार, कमलराज सोसायटीचे चेअरमन मंगेश सावंत, सेक्रेटरी सतीश वाळके आणि खजिनदार शंकर पोखरकर हे बैठकीसाठी कार्यालयात उपस्थित होते. या वेळी 2017 ते 2019 या कालावधीतील सोसायटीच्या लेखापरीक्षणाचा विषय उपस्थित करण्यात आला.
आरोपींनी फिर्यादी आणि त्यांच्या पत्नीवर आर्थिक गैरव्यवहाराचे आरोप करत अपमानास्पद शब्द वापरल्याचे तक्रारीत म्हटले आहे. एका आरोपीने सोसायटी आपली असल्याचा दावा करत फिर्यादी आणि त्यांच्या कुटुंबाला सोसायटीत राहणे कठीण करण्याची धमकी दिल्याचाही आरोप आहे.
तिघांनी संगनमत करून हाताने मारहाण आणि शिवीगाळ केली. त्यानंतर सार्वजनिक ठिकाणी जातिवाचक उल्लेख करून अपमान केल्याचे फिर्यादीने म्हटले आहे.
याप्रकरणी गुन्हा क्रमांक 460/2026 नोंदवण्यात आला असून, भारतीय न्याय संहिता आणि अनुसूचित जाती-जमाती अत्याचार प्रतिबंधक कायद्यानुसार तपास सुरू आहे.
May 12 2026
