चाकणमधील अतिक्रमणे तातडीने हटवा; रस्त्यांची कामे ३१ ऑगस्टपर्यंत पूर्ण करण्याचे निर्देश

पुणे | २८ ऑगस्ट २०२६ : चाकण परिसरातील वाहतूक कोंडीला कारणीभूत ठरणारी अतिक्रमणे तातडीने हटवा आणि रस्त्यांवरील खड्डे, साईडपट्ट्या, गाळ व कचरा हटविण्याची कामे ३१ ऑगस्टपर्यंत पूर्ण करा, असे स्पष्ट निर्देश जिल्हाधिकारी जितेंद्र डुडी यांनी संबंधित यंत्रणांना दिले. रस्त्यांची कामे वेगाने आणि दर्जेदार पद्धतीने पूर्ण करण्यासाठी आवश्यकतेनुसार काही दिवस चोवीस तास वाहतूक पर्यायी मार्गाने वळवावी. काम पूर्ण झाल्यानंतर संबंधित रस्ता तातडीने वाहतुकीसाठी खुला करावा, अशा सूचनाही त्यांनी दिल्या.

चाकण औद्योगिक परिसरातील रस्ते दुरुस्ती, वाहतूक कोंडी निवारण, अतिक्रमण हटविणे, पार्किंग, ड्रेनेज आणि वाहतूक व्यवस्थापनाच्या कामांचा आढावा घेण्यासाठी जिल्हाधिकारी कार्यालयात उच्चस्तरीय समितीची बैठक आयोजित करण्यात आली होती. या बैठकीला आमदार बाबाजी काळे, पिंपरी-चिंचवडचे पोलीस उपायुक्त विक्रांत देशमुख यांच्यासह पीएमआरडीए, सार्वजनिक बांधकाम विभाग, पोलीस, स्थानिक प्रशासन आणि संबंधित यंत्रणांचे अधिकारी उपस्थित होते.

चाकण हे पुणे जिल्ह्यातील महत्त्वाचे औद्योगिक केंद्र आहे. परिसरात मोठ्या प्रमाणात उद्योग, कारखाने, मालवाहतूक आणि कामगारांची ये-जा होत असल्यामुळे रस्त्यांवर वाहनांचा सातत्याने ताण असतो. रस्त्यांवरील खड्डे, अनधिकृत पार्किंग, अतिक्रमणे, अपुरी ड्रेनेज व्यवस्था आणि सुरू असलेली विविध विकासकामे यामुळे काही भागात वाहतूक कोंडीची समस्या निर्माण होत आहे. या पार्श्वभूमीवर सर्व विभागांनी स्वतंत्रपणे काम करण्याऐवजी समन्वयाने आणि निश्चित कालमर्यादेत कार्यवाही करावी, असे जिल्हाधिकारी डुडी यांनी स्पष्ट केले.

३१ ऑगस्टपर्यंत तातडीची कामे पूर्ण करा

चाकण परिसरातील रस्त्यांवरील खड्डे बुजविणे, खराब साईडपट्ट्यांची दुरुस्ती करणे, रस्त्याच्या कडेला साचलेला गाळ आणि कचरा हटविणे तसेच वाहतुकीला अडथळा ठरणाऱ्या बाबींवर तातडीने कार्यवाही करण्याचे निर्देश देण्यात आले. ही सर्व प्राथमिक स्वरूपाची कामे ३१ ऑगस्टपर्यंत पूर्ण झाली पाहिजेत, असे जिल्हाधिकाऱ्यांनी सांगितले.

१ सप्टेंबरपासून पुढील टप्प्यातील दीर्घकालीन कामांना सुरुवात करता यावी, यासाठी ३१ ऑगस्टपर्यंत पूर्ण करावयाच्या कामांचा स्वतंत्र आराखडा तयार करण्यास सांगण्यात आले. प्रत्येक कामासाठी जबाबदार विभाग, काम पूर्ण करण्याची तारीख आणि आवश्यक यंत्रणा याबाबत स्पष्ट नोंद असावी. कोणतीही बाब केवळ पत्रव्यवहार किंवा विभागीय समन्वयाअभावी प्रलंबित राहणार नाही, याची दक्षता घेण्याचे निर्देश देण्यात आले.

आवश्यकतेनुसार चोवीस तास वाहतूक वळवा

रस्त्याचे काम सुरू असताना त्याच मार्गावरून सातत्याने वाहतूक सुरू ठेवल्यास कामाचा वेग आणि गुणवत्ता या दोन्हींवर परिणाम होतो. त्यामुळे रस्त्याच्या कामाचे स्वरूप, कालावधी आणि त्या मार्गावरील वाहनांची संख्या विचारात घेऊन पर्यायी वाहतूक मार्गाचे पूर्वनियोजन करावे, असे जिल्हाधिकारी डुडी यांनी सांगितले.

कामासाठी आवश्यक तेवढ्या कालावधीसाठी वाहतूक पर्यायी मार्गाने वळविण्याची मुभा देऊन संबंधित विभागांनी पूर्ण क्षमतेने काम करावे. आवश्यक असल्यास काही दिवस चोवीस तास काम करून रस्ता पूर्ण करावा आणि त्यानंतर तो तातडीने वाहतुकीसाठी खुला करावा. वाहतूक वळविण्यापूर्वी पर्यायी मार्गाची क्षमता, त्यावरील रस्त्यांची अवस्था, दिशादर्शक फलक, वाहतूक पोलीस आणि वाहनचालकांना पूर्वसूचना देण्याची व्यवस्था करावी, असे निर्देश देण्यात आले.

संबंधित विभागांनी कामांचे टप्पे निश्चित करून वाहतूक व्यवस्थापनाचे स्पष्ट नियोजन करावे. पीएमआरडीएसह विविध यंत्रणांची सुरू असलेली कामे परस्पर समन्वयाने पूर्ण करावीत. एकाच वेळी अनेक ठिकाणी रस्ते बंद झाल्याने वाहतुकीवर विपरीत परिणाम होणार नाही, याची खबरदारी घ्यावी. वाहतूक कोंडीची तीव्रता अधिक असलेल्या ठिकाणी प्राधान्याने उपाययोजना कराव्यात, असेही जिल्हाधिकाऱ्यांनी स्पष्ट केले.

वाहतुकीला अडथळा ठरणारी अतिक्रमणे हटवा

चाकण परिसरातील वाहतूक कोंडीच्या प्रमुख कारणांपैकी एक असलेल्या अतिक्रमणांवर बैठकीत विशेष भर देण्यात आला. रस्ते, चौक, साईडपट्ट्या, ड्रेनेज आणि सार्वजनिक जागांवरील वाहतुकीला अडथळा ठरणारी अतिक्रमणे प्राधान्याने हटवावीत, असे निर्देश संबंधित यंत्रणांना देण्यात आले.

अतिक्रमण हटविल्यानंतर त्याच जागेवर पुन्हा अतिक्रमण होणार नाही, यासाठी केवळ कारवाई करून थांबू नये. त्या ठिकाणी तातडीने रस्ता, पदपथ, ड्रेनेज किंवा आवश्यक पायाभूत सुविधा उभाराव्यात. संबंधित जागेचा पुन्हा गैरवापर होणार नाही, यासाठी कायमस्वरूपी उपाययोजना कराव्यात. कारवाईनंतर जागेवर नियमित देखरेख ठेवण्याचे नियोजनही करण्यात यावे, असे जिल्हाधिकारी डुडी यांनी सांगितले.

चाकण परिसरातील नैसर्गिक नाले आणि ड्रेनेजच्या कामांमध्ये आढळलेल्या त्रुटी तसेच अपूर्ण कामे एका महिन्याच्या आत पूर्ण करण्याचे निर्देश देण्यात आले. पावसाचे पाणी रस्त्यावर साचल्यामुळे रस्त्यांची हानी होणे आणि वाहतूक विस्कळीत होणे टाळण्यासाठी ड्रेनेजची कामे रस्त्यांच्या कामांसोबत समन्वयाने पूर्ण करणे आवश्यक असल्याचे बैठकीत स्पष्ट करण्यात आले.

पार्किंगचा सुस्पष्ट नकाशा तयार करा

चाकण औद्योगिक परिसरात अवजड वाहने, मालवाहतूक करणारे ट्रक, कंपनीच्या बस, रिक्षा आणि खासगी वाहनांची संख्या मोठी आहे. रस्त्याच्या कडेला होणाऱ्या अनधिकृत पार्किंगमुळे उपलब्ध रस्त्याची रुंदी कमी होऊन वाहतूक कोंडी वाढते. त्यामुळे उपलब्ध पार्किंगच्या जागांचा सुस्पष्ट नकाशा तयार करून तो उद्योग, वाहनचालक आणि वाहतूकदारांपर्यंत पोहोचवावा, असे निर्देश जिल्हाधिकाऱ्यांनी दिले.

कोणत्या उद्योगातील किंवा कोणत्या प्रकारच्या वाहनांसाठी कोणती पार्किंगची जागा उपलब्ध आहे, याची माहिती सहज समजेल अशा पद्धतीने द्यावी. वाहतूकदारांच्या अडचणी समजून घेण्यासाठी ट्रान्सपोर्ट विभाग आणि ट्रान्सपोर्ट असोसिएशनच्या प्रतिनिधींसोबत स्वतंत्र बैठक आयोजित करावी. रिक्षा, मालवाहू वाहने आणि अन्य वाहनांच्या थांब्यांचा तसेच त्यांच्या वाहतुकीच्या हालचालींचा अभ्यास करून त्याचा एकात्मिक वाहतूक आराखड्यात समावेश करावा, असे सांगण्यात आले.

चाकणचे सर्वंकष सर्वेक्षण करण्याचे निर्देश

चाकण परिसरातील सर्व प्रमुख आणि अंतर्गत रस्ते, ड्रेनेज, पार्किंग, चौक आणि वाहतूक व्यवस्थेचे सर्वंकष सर्वेक्षण करण्याचे निर्देश संबंधित विभागांना देण्यात आले. सर्वेक्षणादरम्यान आढळलेल्या त्रुटींची नोंद करून प्रत्येक समस्येवर कालबद्ध पद्धतीने उपाययोजना करावी. सर्व विभागांचा समावेश असलेला एकात्मिक आराखडा तयार करून त्यानुसार कामांची अंमलबजावणी करावी, असे जिल्हाधिकारी डुडी यांनी सांगितले.

रस्त्याचे काम पूर्ण झाल्यानंतर पुन्हा ड्रेनेज, पाइपलाइन किंवा अन्य सुविधांसाठी त्याच ठिकाणी रस्ता खोदण्याची वेळ येऊ नये. यासाठी रस्ते, ड्रेनेज, पाणीपुरवठा, वाहतूक आणि पार्किंगची कामे नियोजनपूर्वक आणि समन्वयाने करावीत. भविष्यात वारंवार दुरुस्ती करावी लागू नये, यासाठी कामांचा दर्जा आणि दीर्घकालीन गरजा विचारात घेण्याचे निर्देश देण्यात आले.

बैठकीत चाकण परिसरातील नागरिकांनी रस्ते, वाहतूक कोंडी, पार्किंग, अतिक्रमणे आणि ड्रेनेजसंदर्भातील विविध समस्या मांडल्या. नागरिकांनी उपस्थित केलेल्या अडचणींवर संबंधित यंत्रणांनी तातडीने कार्यवाही करावी आणि झालेल्या कार्यवाहीचा नियमित आढावा घ्यावा, असे जिल्हाधिकाऱ्यांनी सांगितले.

“रस्त्याच्या कामासाठी आवश्यक तेवढ्या कालावधीसाठी वाहतूक वळविण्याची मुभा देऊन काम पूर्ण क्षमतेने करा. ३१ ऑगस्टपर्यंत तातडीची कामे पूर्ण करा. अतिक्रमण हटविल्यानंतर त्या जागेवर पुन्हा अतिक्रमण होणार नाही, यासाठी आवश्यक पायाभूत सुविधा तातडीने उभारा,” असे जिल्हाधिकारी जितेंद्र डुडी यांनी स्पष्ट केले.