Oct 27 2026
चिखली | २३ ऑक्टोबर २०२६ : पिंपरी-चिंचवडमधील रुपीनगर येथील नवमहाराष्ट्र माध्यमिक विद्यालयात काम करणाऱ्या एका शिक्षकाला संस्थेच्या खजिनदार आणि सचिवाने कार्यालयात बोलावून शिवीगाळ, धमकी आणि मारहाण केल्याचा प्रकार समोर आला आहे. या प्रकरणी चिखली पोलीस ठाण्यात दोघांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, दिलीप दत्तात्रय पांडुळे (वय ३९ वर्षे, मूळ रा. मु. पिंपरी (मुंबरी), ता. आष्टी, जि. बीड) यांनी फिर्याद दिली आहे. ते नवमहाराष्ट्र माध्यमिक विद्यालयात नोकरी करतात.
या प्रकरणी किशोर आनंदराव गौंड (वय अंदाजे ४२ वर्षे) आणि आशिष आनंदराव गौंड (वय अंदाजे ३३ वर्षे, दोघे रा. रुपीनगर, तळवडे, पुणे) यांच्याविरोधात गुन्हा दाखल करण्यात आला आहे. फिर्यादीनुसार, किशोर गौंड हे संस्थेचे खजिनदार, तर आशिष गौंड हे सचिव आहेत.
२३ ऑक्टोबर २०२६ रोजी दुपारी सुमारे १२.२० वाजता फिर्यादी शाळेत काम करत असताना आरोपींनी त्यांना कार्यालयात बोलावले. त्यानंतर मुलांना व्यवस्थित शिकवत नसल्याचा आणि पालकांच्या तक्रारी येत असल्याचा उल्लेख करून फिर्यादींना जाब विचारण्यात आल्याचे तक्रारीत म्हटले आहे.
फिर्यादीने आपल्यावरील आरोप चुकीचे असल्याचे सांगितल्यानंतर आरोपींनी त्यांना शिवीगाळ करण्यास सुरुवात केली. यावेळी फिर्यादींनी शिवीगाळ करू नये आणि काही तक्रार असल्यास मुख्याध्यापकांकडे विचारणा करावी, असे सांगितले.
मात्र, त्यानंतरही आरोपींनी धमकावून हाताने आणि लाथाबुक्क्यांनी मारहाण केल्याचा आरोप फिर्यादीत करण्यात आला आहे. मारहाणीदरम्यान फिर्यादीच्या सुरक्षिततेला धोका निर्माण होईल, अशा पद्धतीने त्यांना भिंतीवर ढकलण्यात आल्याचेही तक्रारीत नमूद आहे.
या प्रकरणी गुन्हा क्रमांक ८६६/२०२६ नोंदवण्यात आला असून, भारतीय न्याय संहितेच्या कलम ११५(२), ३५२, ३५१(२), ३३१ आणि ३(५) अन्वये गुन्हा दाखल करण्यात आला आहे.
या प्रकरणाचा पुढील तपास चिखली पोलीस करीत आहेत.
May 12 2026
