Oct 27 2026
उत्तर महाळुंगे | २६ ऑक्टोबर २०२६ : खेड तालुक्यातील खालुंबे गावाच्या हद्दीत पानसे ऑटो कंपनीसमोरील रस्त्यावर सहा अज्ञात व्यक्तींनी ट्रक अडवून चालकाला मारहाण केल्याची घटना घडली आहे. या घटनेत ट्रकची काच फोडून नुकसान करण्यात आले. तसेच रस्त्यावर अडथळा निर्माण झाल्याने वाहतूक कोंडी झाल्याचे फिर्यादीत नमूद करण्यात आले आहे.
पोलिसांनी दिलेल्या माहितीनुसार, प्रवीण भाऊसाहेब चौधरी (वय ४१ वर्षे, व्यवसाय चालक, रा. पाडळी गाव, मारुती मंदिराजवळ, ता. खेड, जि. पुणे) यांनी या प्रकरणी फिर्याद दिली आहे.
ही घटना २६ ऑक्टोबर २०२६ रोजी सकाळी ७.३० ते ७.४५ वाजण्याच्या दरम्यान घडली. फिर्यादी चौधरी हे त्यांचा एमएच १४ जीयू ४८१८ क्रमांकाचा ट्रक घेऊन वाकन खालुंबे गावाच्या हद्दीतील पानसे ऑटो कंपनीसमोरील रस्त्याने जात होते.
यावेळी अंदाजे २१ ते २६ वर्षे वयोगटातील सहा अज्ञात व्यक्तींनी त्यांचा ट्रक अडवला. फिर्यादीनुसार, या व्यक्तींपैकी काहींनी हातात दगड घेतले होते. त्यांनी ट्रकच्या बोनेटवर चढून काच दगडाने फोडली आणि वाहनाचे नुकसान केले.
त्यानंतर संबंधित व्यक्तींनी ट्रकचालकाला हाताने मारहाण केली. तसेच शिवीगाळ करत रस्त्यावर अडथळा निर्माण केल्याचा आरोप आहे.
फिर्यादीच्या म्हणण्यानुसार, आरोपींनी पानसे कंपनीकडून न्याय मिळाला नाही, तर चक्का जाम करू, असे मोठ्याने सांगत दगडफेक केली. या प्रकारामुळे परिसरात दहशतीचे वातावरण निर्माण झाले. आरोपींच्या आक्रमक वर्तनामुळे फिर्यादी आणि इतर नागरिक घाबरून घटनास्थळावरून निघून गेल्याचे तक्रारीत नमूद करण्यात आले आहे.
या प्रकरणी उत्तर महाळुंगे पोलीस ठाण्यात गुन्हा क्रमांक २०२/२०२६ दाखल करण्यात आला आहे. भारतीय न्याय संहितेच्या कलम १२६(२), १२७(२), १८९, १९१(२), १२५, ११५(२), ३२४(४) तसेच क्रिमिनल लॉ अमेंडमेंट कायद्याच्या कलम ७ अन्वये गुन्हा नोंदवण्यात आला आहे.
या प्रकरणाचा पुढील तपास उत्तर महाळुंगे पोलीस करीत आहेत.
May 12 2026
