Oct 21 2026
मुंबई | १९ ऑक्टोबर २०२६ : महाराष्ट्र विधान परिषदेच्या पाच पदवीधर आणि शिक्षक मतदारसंघांसाठी शुक्रवार, २३ ऑक्टोबर २०२६ रोजी मतदान होणार आहे. सकाळी ८ ते सायंकाळी ४ वाजेपर्यंत मतदान प्रक्रिया पार पडणार असून, या निवडणुकीत एकूण १८२ उमेदवार रिंगणात आहेत. पाचही मतदारसंघांतील १० लाख ६८ हजार ७२ मतदारांसाठी २ हजार ४१९ मतदान केंद्रांची व्यवस्था करण्यात आली आहे.
औरंगाबाद, पुणे आणि नागपूर विभागातील तीन पदवीधर मतदारसंघांसह अमरावती आणि पुणे विभागातील दोन शिक्षक मतदारसंघांसाठी ही निवडणूक होत आहे. या पाचही जागांवरील विद्यमान सदस्यांचा कार्यकाळ ६ डिसेंबर २०२६ रोजी संपणार आहे.
पुणे विभाग पदवीधर मतदारसंघात सर्वाधिक ४७ उमेदवार निवडणूक लढवत आहेत. औरंगाबाद पदवीधर मतदारसंघातून ४१, नागपूर पदवीधर मतदारसंघातून ३८, अमरावती शिक्षक मतदारसंघातून २६ आणि पुणे शिक्षक मतदारसंघातून ३० उमेदवार रिंगणात आहेत.
मतदारसंख्येच्या बाबतीतही पुणे विभाग पदवीधर मतदारसंघ आघाडीवर असून, येथे ३ लाख ८८ हजार १९ मतदार आहेत. तर अमरावती शिक्षक मतदारसंघात सर्वात कमी ३५ हजार ८१० मतदार नोंदणीकृत आहेत.
मतदानासाठी औरंगाबाद पदवीधर मतदारसंघात ८४२, पुणे पदवीधर मतदारसंघात ७४१, नागपूर पदवीधर मतदारसंघात ४४५, अमरावती शिक्षक मतदारसंघात ८१ आणि पुणे शिक्षक मतदारसंघात ३१० मतदान केंद्रे निश्चित करण्यात आली आहेत.
या निवडणुकीत विद्यमान सदस्य सतीश चव्हाण, अरुण लाड, अभिजीत वंजारी, किरण सरनाईक आणि जयंत आसगावकर यांच्या जागांसाठी मतदान होणार आहे.
मंगळवार, २७ ऑक्टोबर रोजी मतमोजणी होणार असून, संपूर्ण निवडणूक प्रक्रिया ३१ ऑक्टोबर २०२६ पर्यंत पूर्ण करण्याचे नियोजन आहे. निवडणूक निष्पक्ष, पारदर्शक आणि निर्भय वातावरणात पार पाडण्यासाठी निवडणूक यंत्रणा सज्ज असल्याची माहिती देण्यात आली आहे.
May 12 2026
