Oct 20 2026
वाकड | १९ ऑक्टोबर २०२६ : वाकड परिसरात भरधाव कारने स्कूटरला पाठीमागून धडक दिल्याने स्कूटरवरील दोन तरुणी जखमी झाल्याची घटना घडली आहे. अपघातानंतर जखमींना मदत न करता कारचालक घटनास्थळावरून निघून गेल्याचा आरोप असून, या प्रकरणी वाकड पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना १७ ऑक्टोबर २०२६ रोजी रात्री ११.२५ वाजण्याच्या सुमारास वाकड येथील मानकर चौक ते छत्रपती चौकाकडे जाणाऱ्या रस्त्यावर, जावा शोरूमसमोर घडली.
या प्रकरणी एका महिलेने फिर्याद दिली आहे. एमएच-१४ एए-००१० क्रमांकाच्या पांढऱ्या रंगाच्या टोयोटा फॉर्च्युनर कारवरील अज्ञात चालकाविरोधात गुन्हा दाखल करण्यात आला आहे.
फिर्यादीनुसार, फिर्यादी स्कूटर चालवत होती. मैत्रीण तिच्या पाठीमागे बसली होती. दोघी मानकर चौकातून छत्रपती चौकाच्या दिशेने जात होत्या.
यावेळी पाठीमागून आलेल्या पांढऱ्या रंगाच्या फॉर्च्युनर कारचालकाने भरधाव वेगात आणि निष्काळजीपणे वाहन चालवत स्कूटरला पाठीमागून धडक दिल्याचा आरोप आहे.
या धडकेमुळे स्कूटरसह दोघी रस्त्यावर पडल्या. अपघातात फिर्यादीच्या उजव्या डोळ्याला, तर मैत्रीणच्या डाव्या पायाला दुखापत झाल्याचे तक्रारीत नमूद आहे.
अपघातानंतर कारचालकाने जखमींना उपचारासाठी रुग्णालयात न नेता कार घेऊन घटनास्थळावरून पलायन केल्याचा आरोप फिर्यादीने केला आहे.
या प्रकरणी १९ ऑक्टोबर २०२६ रोजी वाकड पोलीस ठाण्यात गुन्हा क्रमांक ७४३/२०२६ दाखल करण्यात आला आहे. भारतीय न्याय संहितेच्या कलम २८१ आणि १२५(अ) तसेच मोटार वाहन कायद्याच्या संबंधित कलमांनुसार गुन्हा नोंदविण्यात आला असून, पुढील तपास पोलीस करत आहेत.
May 12 2026
